17 noyabr Azərbaycan tarixinin ən şərəfli səhifələrindən biridir. Bu günün Azərbaycanın erməni təcavüzünə, separatizminə, torpaqlarımızın ələ keçirilməsinə qarşı ümummilli müqavimət günü kimi çox böyük əhəmiyyətli rolu oldu.
Bu sözləri Globalinfo.az-a açıqlamasında Azərbaycan Xalq Partiyasının sədri Pənah Hüseyn Milli Dirçəliş Günü ilə bağlı danışarkən deyib.
O bildirib ki, Azərbaycan xalqı Sovet hakimiyyəti dövründə Qarabağın ermənilərə verilməsinin qarşısını almağa nail oldu:
“Bu dirçəliş Qarabağın qorunub saxlanmasında, erməni separatizminin qarşısının alınmasında, milli və dövlət müstəqilliyi şüurunun yeni mərhələyə daxil olmasında tarixi əhəmiyyətə malik rol oynadı. 1988-ci ilin noyabr-dekabr hadisələri Azərbaycan xalqının nəyə qadir olduğunu və potensialını aşkara çıxardı. 17 noyabr tarixi müstəqilliyimizin və bütöv Azərbaycan uğrunda mübarizəmizin əsasında dayanır”.
Zaira Akifqızı
Globalinfo.az
