İranlı fəal qadın, “Instagram” səhifəsində yayımladığı video ilə 1325-ci ildə (1946-cı il) Azərbaycan xalqına qarşı törədilmiş qırğınları açıq şəkildə müdafiə edib.
Globalinfo.az xəbər verir ki, onun bu addımı ictimaiyyət tərəfindən birmənalı qarşılanmayıb.
Videoda qadın belə deyib: “Əgər Pəhləvi dövründə yaşasaydım, daha çox azərbaycanlını (türk) öldürərdim. İran şahındır!”
Fəal daha sonra Azərbaycan xalqının Pəhləvi rejimi tərəfindən qırılması ilə bağlı hər hansı sənədin mövcudluğunu inkar edib, bu barədə heç bir dəlilin olmadığını bildirib.
Əslən Təbrizdən olan vəkil Sina Yusifi isə sözügedən qadının məsuliyyətə cəlb edilməsi üçün hərəkətə keçib. Belə ki, o, “X” sosial şəbəkə hesabında bunları yazıb:
“Azad ifadə imkanlarının mövcud olduğu bir ölkədə nifrət yaymaq və insanların kütləvi qırğınına təşviq etmək cinayətdir. Belə əməlləri törədən şəxs yalnız işdən çıxarılmaqla kifayətlənməyəcək, həm də müstəqil məhkəmə tərəfindən həbs cəzası ilə üzləşəcək. Hüquqi təqib davam edəcək”.
Qeyd edək ki, qadının açıqlaması ilə bağlı məlumatı yayımlayan “Araz News” bu məlumatları təkzib edib və hadisələrin tarixçəsini belə təqdim edib:
“Erada Azerbaijan” qəzetinin 18-ci nömrəsində (2 Xordad 1330 / 1946-cı il) yazılıb ki, əgər cənab Bayat, yəni Məhsud Mosaddeqin qohumu, Azərbaycanın qubernatoru olmasaydı və şah ordusu Pişəvəri tərəfdarları qarşısında təslim olmasaydı, Azərbaycan gənclərindən təxminən 20 min nəfərin qanı tökülməzdi.
Pəhləvi rejiminin yüksək rütbəli zabiti Hussein Fardust isə xatirələr kitabında yalnız Təbriz şəhərində 1325-ci ilin 22 Azər (1946-cı il dekabrın 13-14-ü) hadisələrini belə təsvir edir:
“Küçələrin kənarında edam olunmuş insanların cəsədləri çox görünürdü və təxminən 2000–3000 nəfər edam edilmişdi.”
Yəni bu, 1946-cı ildə Azərbaycanın Pişəvəri hərəkatı və Milli Hökumət quruluşuna qarşı Pəhləvi rejiminin hərbi əməliyyatları zamanı baş vermiş Təbriz qırğını və repressiyaları ilə bağlıdır. Hadisələrdə minlərlə insan öldürülmüş və şəhərlərdə ciddi dağıntılar baş vermişdi.
Bildirək ki, Sina Yusifi Almaniyada yaşayan azərbaycanlı hüquqşünasdır və Güney Azərbaycan İnsan Haqları Təşkilatının vitse-prezidenti kimi fəaliyyət göstərib.
O, İran rejimi tərəfindən fəallara dəstək vermək və həbsdəki məhbuslarla bağlı açıqlamalar verdiyi üçün təzyiqlərə məruz qalıb və sosial media paylaşımları səbəbindən mühakimə və ittihamlarla üzləşib.
Safura Bənnayeva
Globalinfo.az
