53 nömrəli tam orta məktəbdə şagirdlər arasında dava düşüb.
Globalinfo.az bildirir ki, dava 7-ci sinif şagirdləri arasında baş verib. Belə ki, şagirdə sinif yoldaşları tərəfindən başına ağır zərbələr vurulmaqla xəsarətlər yetirilib.
Bakı Şəhəri üzrə Təhsil İdarəsindən Oxu.Az-ın sorğusuna cavab olaraq bildirilib ki, 53 nömrəli tam orta məktəbdə qısnamaya məruz qaldığı iddia olunan uşaq 2023-cü ilin sentyabrından VII sinfin şagird kontingentinə daxil olub:
“Uşaqlar arasında mübahisə yaranması ilə bağlı məsələ məktəb rəhbərliyinin nəzarətindədir. Uşağın nənəsinin müraciətləri nəzərə alınaraq, dərs ilinin əvvəlində direktorun iştirakı ilə həmin sinfin valideyn iclası da çağırılıb. İclasda sinifdə ciddi problem olmadığı və şagirdin sinfə adaptasiya baxımından çətinlik yaşadığı məlum olub. Bundan sonra şagirdə məktəb psixoloqu və müəllimlərin dəstək tədbirləri artırılıb. Sinif rəhbəri də 2023-cü ilin noyabr ayında daha təcrübəli müəllimlə əvəz edilib.
Onu da qeyd edək ki, məktəb “Məktəblinin dostu” və “Şagird davranış qaydaları” layihələrinə qoşulub. Məktəbdə sağlam təhsil mühitinin qorunması üçün hər iki layihə çərçivəsində müvafiq tədbirlər həyata keçirilməkdədir”.
***14:20
Bakının Yasamal rayonunda yerləşən 53 saylı orta məktəbin 7-ci sinif şagirdi (A.T – ad şərtidir) zorakılığa məruz qalıb.
Globalinfo.az xəbər verir ki, bununla bağlı sosial şəbəkələrdə məlumat yayılıb.
Bildirilib ki, şagird sinif yoldaşlarının zorakılığı ilə üzləşib.
Globalinfo.az-ın əməkdaşı 53 saylı məktəblə əlaqə saxlamağa çalışsa da, zəngə cavab verən olmayıb.
Qarşı tərəfin mövqeyini dərc etməyə hazırıq.
Zaira Akifqızı
Globalinfo.az
