Kanada Toronto Universitetinin alimləri sahibkar İlon Maska məxsus X sosial şəbəkəsinin (keçmiş Twitter) insanların psixi sağlamlığına təsirini araşdırıblar.
Globalinfo.az-ın Lent.az-a istinadla xəbərinə görə, məlum olub ki, sosial şəbəkədə olmaq insanların əhval-ruhiyyəsini pisə doğru dəyişə bilər.
Tədqiqat üçün 252 nəfərdən ibarət qrup yaradılıb ki, onların xarakterindəki psixoloji dəyişiklikləri təhlil etmək üçün həftədə ən azı iki dəfə sosial şəbəkəyə daxil olmalı idilər. Məlumat 2021-ci ilin mart və iyun ayları arasında toplanıb.
İştirakçılar bir həftə ərzində gündə beş dəfə alimlərin suallarını cavablandırmalı olublar. Suallar platformadakı istifadəçilərin fəaliyyətinə aid olub.
Məlumata görə, ümumilikdə sosial şəbəkədən istifadə insanların rifah hissini azaldıb. Həm də X-də uzun müddət qalmaq insanları cansıxıcı və tənha hiss etdirib. Bundan əlavə, elm adamları effektiv qütbləşmədə kiçik bir artım görüblər ki, bu da insanların bəzi məsələlərdə fikirlərini dəstəkləmədikləri qruplarla mübahisə etmək istəyinin kəskinləşdiyini göstərir. Könüllülər arasında qəzəb hissi də güclənib.
Eyni zamanda, eksperiment zamanı məlum olub ki, yazılar dərc edildikdə və şərhlərdə müəyyən müzakirələrdə iştirak etdikdə insanların mənsubiyyət hissi artır.
Araşdırmanın aparıcı müəllifi Viktoriya Oldemburqo de Mello deyib: “Tədqiqatımızın əsas tapıntısı X istifadəsi ilə bəzi mənfi nəticələr arasında potensial əlaqə idi”.
