Binədə baş verən yol-nəqliyyat hadisəsinə qanunsuz sərnişindaşıma ilə məşğul olan avtobusun səbəb olduğu bildirilir.
Globalinfo.az bildirir ki, bu barədə Oxu.Az-a açıqlamasında 160 nömrəli marşrut xətti üzrə fəaliyyət göstərən avtobusların daşıyıcısı olan “Çinar Trans” MMC-nin direktoru İsmayıl Yaqub oğlu Hüseynov məlumat verib.
Onun sözlərinə görə, hadisə 160 nömrəli avtobus Binə qəsəbəsində dayanacaqda sərnişin mindirib-düşürdüyü zaman baş verib:
“160 nömrəli avtobus Binədə dayanacaqda durduğu zaman qanunsuz sərnişindaşıma ilə məşğul olan avtobuslardan biri arxadan ona çırpılıb. Həmin avtobuslar Binədən metronun “Koroğlu” stansiyasına qədər qanunsuz fəaliyyət göstərirlər. “Hyundai” markalı avtobus elə gəldiyi sürətlə də bizim avtobusu arxadan vurub. Nəticədə avtobusumuza külli miqdarda maddi ziyan dəyib. Xəsarət alanlar isə əsasən vuran avtobusun sərnişinləri olub. Bizim avtobusdakı sərnişinlərdən bəzilərinə yalnız qırılan şüşələrin qırıntıları dəyib.
Həmin avtobuslar qanunsuz fəaliyyət göstərirlər. Bununla bağlı dəfələrlə aidiyyəti qurumlara şikayət etmişik, lakin buna baxmayaraq, fəaliyyətlərini davam etdirirlər”, – deyə İ.Hüseynov bildirib.
***10:55
Xəzər rayonu Binə qəsəbəsində iki avtobus toqquşub.
Globalinfo.az xəbər verir ki, 160 nömrəli xətt üzrə hərəkət edən “İSUZU” markalı avtobusla “Hyundai” markalı avtobus toqquşub.
Bu barədə “Report”un sorğusuna cavab olaraq TƏBİB-dən bildirilib.
Məlumatda qeyd olunub ki, 13 nəfər (7 kişi, 6 qadın) Sabunçu Tibb Mərkəzinə, 9 kişi isə Kliniki Tibbi Mərkəzə hospitalizasiya olunub.
Kliniki Tibbi Mərkəzə təxliyə olunan şəxslərə bədənin müxtəlif nahiyələrinin müştərək travmaları diaqnozu təyin olunub və zəruri tibbi xidmətlər göstərilib.
Vəziyyətləri stabil qiymətləndirilən pasiyentlərin müalicəsi Təcili tibbi yardım şöbəsində davam etdirilir.
Sabunçu Tibb Mərkəzində yaralılara başın, bədənin, ətrafların travmaları və sınıqları diaqnozları təyin olunub və zəruri tibbi xidmətlər göstərilib.
Vəziyyəti orta ağır qiymətləndirilən 1972-ci il təvəllüdlü qadının müalicəsi Reanimasiya şöbəsində davam etdirilir.
Digər 12 nəfərin vəziyyəti qənaətbəxş qiymətləndirildiyindən hər biri ambulator müalicə üçün evə buraxılıb.
Qeyd edək ki, hadisə iyulun 24-də saat 07:40-da baş verib. “Hyundai” markalı, 88-BS-435 dövlət nömrə nişanlı avtobus Binə qəsəbəsi ərazisində 160 nömrəli xətt üzrə hərəkət edən İSUZU markalı, 77-JD-305 dövlət nömrə nişanlı sərnişin avtobusuna çırpılıb.
Həmçinin oxuyun
