WhatsApp Image 2026 11 16 at 23.40.23

Myanmanın paytaxtı Neypidoda inşa edilən 20 zolaqlı nəhəng magistral yol qeyri-adi görünüşü ilə diqqət çəkir. Eyni istiqamətdə çoxsaylı nəqliyyat vasitələrinin hərəkəti üçün nəzərdə tutulan yolun demək olar ki, boş qalması maraq doğurur.

Globalinfo.az xəbər verir ki, 2005-ci ildə ölkənin paytaxtı elan edilən Neypidoda yerləşən bu magistral yol parlament binasına aparan əsas marşrutlardan biridir.

Genişliyi və zolaqlarının sayı ilə seçilən yol dünyanın ən qeyri-adi nəqliyyat infrastrukturu layihələrindən hesab olunur. Magistralın 20 zolaqlı olması eyni vaxtda çoxlu sayda avtomobilin hərəkətinə imkan versə də, paytaxtın bu hissəsində nəqliyyat sıxlığı olduqca aşağıdır. Nəticədə, geniş asfalt örtüyü və uzun, düz istiqaməti ilə seçilən yolun böyük hissəsi boş görünür.

Yolun bu qədər geniş inşa edilməsinin səbəbi ilə bağlı müxtəlif iddialar səsləndirilir. Onlardan birinə görə, magistral təcili vəziyyətlərdə hərbi və digər təyyarələrin eniş edə bilməsi üçün nəzərdə tutulub. Lakin bu iddianı təsdiqləyən rəsmi açıqlama mövcud deyil.

Hazırda Myanmanın 20 zolaqlı magistral yolu həm qeyri-adi miqyası, həm də üzərində nəqliyyatın azlığı ilə dünyanın diqqətçəkən infrastruktur nümunələrindən biri olaraq qalır.

Tahir Turan
Globalinfo.az

Paylaş: