Ermənistanda Gümrüdə yerləşən Rusiya hərbi bazasının iki hərbçisi saxlanılıb. Onlar Ukrayna vətəndaşı Dmitri Samuilenkoya qarşı fiziki zorakılıq göstərməkdə şübhəli bilinirlər.
Globalinfo.az-ın xəbərinə görə, zərərçəkmiş şəxs təxminən bir ay əvvəl Gümrünün Ani rayonunda iki rusiyalı hərbçinin hücumuna məruz qaldığını bildirərək hüquq-mühafizə orqanlarına müraciət edib.
Ermənistan İstintaq Komitəsi hadisə ilə bağlı bir qrup şəxs tərəfindən fiziki zorakılıq tətbiq edilməsi faktı üzrə araşdırmaya başlanıldığını açıqlayıb. İki hərbçi barəsində sağlamlığa yüngül zərər vurma ittihamı ilə cinayət işi açılıb. Onların adları açıqlanmır.
Hələlik ehtimal olunan hücumun motivləri və hadisənin digər təfərrüatları məlum deyil.
Rusiya hərbi bazası və Rusiyanın Ermənistandakı səfirliyi məsələ ilə bağlı hələlik açıqlama verməyib.
Əliyar Xəlil
