Erməni ekspert Oskan Sərkisyan Ermənistan Baş naziri Nikol Paşinyanın demarkasiya prosesi nəticəsində Azərbaycana təhvil verilən yüksəkliyi izləməsinə isterik reaksiya verib.
Globalinfo.az xəbər verir ki, o bu barədə sosial şəbəkə hesabında yazıb.
“Ermənistan-Gürcüstan magistral yolunun kənarında yerləşən strateji əhəmiyyətli yüksəklik Azərbaycana təhvil verildi. Bu, sadəcə dəhşətlidir! Ölkənin (Ermənistanın – red.) ali baş komandanı binoklla həmin ərazilərə baxıb “Mən heç nə başa düşmədim” deyir. Ola bilsin, xəbəri yoxdur, amma 1990-cı il martın 23-24-də, avqustun 18-20-də Bağanis-Ayrımda şiddətli döyüşlər gedib”, – O.Sərkisyan bildirib.
Qeyd edək ki, Oskan Sərkisyanın qeyd etdiyi dönəmlərdə ermənilər sözügedən kəndlərdəki azərbaycanlılara hücumlar etmişdilər. Hətta Bağanis-Ayrımda bir evdə 7 azərbaycanlı ermənilər tərəfindən yandırılmışdı.
Bundan başqa, həmin hücumlar nəticəsində Ermənistan Qazaxın 7 kəndini işğal etmişdi. Bu il aparılan demarkasiya prosesi nəticəsində 7 kənddən 4-ü Azərbaycana qaytarılıb.
Əliyar Xəlil
Globalinfo.az
