Türkiyənin Ağrı vilayətində, Doğubayazıt yaxınlığında yerləşən və Nuhun gəmisi ilə əlaqələndirilən Durupınar Formasiyasında aparılan araşdırmalar zamanı təxminən 9 metr dərinlikdə kömürləşmiş ağac parçaları aşkar edilib.
Globalinfo.az xəbər verir ki, “Greek Reporter” nəşrinin məlumatına görə, tədqiqatlara Sivas Cümhuriyyət Universitetinin professoru Çenker Atila rəhbərlik edib. Tapıntı bölgədə aparılan qazma və geoloji araşdırmalar zamanı üzə çıxıb.
Tədqiqatçılar ərazidə yeraltı radar müayinələri də həyata keçiriblər. İlkin nəticələrdə dəhlizlərə bənzər anomaliyalar, boşluqlar və üç ayrı səviyyədən ibarət ola biləcək struktur müəyyən edilib. Alimlər bu quruluşun Nuhun gəmisinin üç göyərtəli olması barədə təsvirlə uyğunluğuna diqqət çəkirlər.
Bununla belə, mütəxəssislər tapıntıların gəmi qalıqları olduğunu təsdiqləmək üçün kifayət qədər elmi sübutun olmadığını bildirirlər.
Radar görüntülərində müşahidə edilən strukturların təbii geoloji proseslər nəticəsində yaranması da mümkündür. İndiyədək radar məlumatlarının yalnız təxminən 20 faizi təhlil edilib.
Aşkar olunan ağac parçalarının yaşı və mənşəyi də hələ müəyyənləşdirilməyib. Nümunələrin qədim gəmi qalıqları deyil, başqa təbii və ya insan fəaliyyəti nəticəsində yaranmış materiallar olması ehtimalı da nəzərdən keçirilir.
Tapıntıların mənşəyini müəyyənləşdirmək üçün ağac nümunələri laboratoriyaya göndərilib. Karbon-14 analizi, ağacın anatomik quruluşunun və ətrafdakı geoloji təbəqələrin öyrənilməsi nəzərdə tutulur.
Tahir Turan
Globalinfo.az
