Ərdoğanın andiçmə mərasimi nə vaxt keçiriləcək?

“İyunun 2-də Türkiyə Böyük Millət Məclisində (TBMM) millət vəkillərinin andiçmə mərasimi keçiriləcək, prezidentin andiçmə mərasimi isə təqvimə əsasən, şənbə günü, iyunun 3-də baş tutacaq”.

Globalinfo.az Oxu.az-a istinadən xəbər verir ki, bu sözləri Türkiyə prezidentinin baş müşaviri, Prezidentin Hüquq Siyasəti Şurasının sədr müavini Mehmet Uçum deyib.

Mehmet Uçum seçkilərin yekun nəticələrinin rəsmi açıqlanmasından sonra baş tutacaq proseslə bağlı öz “Twitter” hesabında açıqlama verib.

Uçum Mərkəzi Seçki Komissiyasının (YSK) son seçki nəticələrini bu gün “Resmi Gazete”yə göndərdiyini və yekun nəticələrin elan edildiyini xatırladıb. O bildirib ki, elandan sonrakı üçüncü gün TBMM saat 14:00-da toplanacaq.

“Prezident seçkisinin rəsmi yekun nəticəsi cümə axşamı günü açıqlanacaq və Türkiyə Böyük Millət Məclisinin sədrinə bildiriləcək. Elan verildiyi gün YSK tərəfindən hazırlanan prezident seçkisinə dair hesabat da seçilmiş prezidentə təqdim edilməsi üçün TBMM rəhbərliyinə veriləcək. TBMM-in ilk iclasından sonra üç gün ərzində isə prezident protokolu təslim alaraq and içəcək”, – deyə o qeyd edib.

Mehmet Uçum bildirib ki, bu təqvimə görə, iyunun 2-də Türkiyə Böyük Millət Məclisi onun ən yaşlı üzvü olan Dövlət Bağçalının sədrliyi ilə toplanacaq və millət vəkillərinin andiçmə mərasimi keçiriləcək.

“İyunun 3-ü, şənbə günü TBMM-in müvəqqəti sədri cənab Bağçalı tərəfindən prezident seçkisi ilə bağlı hesabat seçilmiş Prezident Rəcəb Tayyib Ərdoğana təqdim ediləcək. Sonra elə həmin gün Külliyedə yeni prezidentin andiçmə mərasimi keçiriləcək. Mərasimdən sonra prezidentimiz kabinetin tərkibini elan edəcək.

İyunun 4-də təyin edilmiş vitse-prezident/müavinlər və nazirlər Türkiyə Böyük Millət Məclisinin ümumi yığıncağında and içəcəklər”, – deyə o bildirib.

***09:25

Türkiyədə yenidən Prezident seçilən Rəcəb Tayyib Ərdoğanın andiçmə mərasimi iyunun 2-si və yaxud 6-sı təşkil edilə bilər.

Globalinfo.az “Qafqazinfo”ya istinadən xəbər verir ki, bu barədə məlumatı “Milliyet” qəzeti yayıb.

Qəzet yazır ki, Ərdoğan məhz həmin gün yeni hökumətə daxil olacaq nazirlərin adlarını da elan edəcək.

Qeyd olunur ki, Ali Seçki Şurası prezident və parlament seçkilərinin yekun nəticələrini bu gün açıqlayacaq. Deputatların da iyunun 2-si and içəcəyi bildirilir.