İslam İnqilabı Keşikçiləri Korpusu (SEPAH) zəifləyən siyasi mühitə baxmayaraq İranda hakimiyyət üzərində nəzarəti qoruyub saxlayır, lakin eyni zamanda daxili parçalanmalarla üz-üzədir.
Globalinfo.az xəbər verir ki, bu barədə Yerusəlim Strategiya və Təhlükəsizlik İnstitutu (JISS) məqalə dərc edib. Analitiklərin qiymətləndirməsinə görə, İran hazırda diplomatik çıxılmaz vəziyyətdədir.
Hakim hərbi-siyasi elita isə daxili müxalifəti nəzarətdə saxlamaq imkanını itirməsə də, mövcud böhrandan çıxış yollarını tapmaqda çətinlik çəkir. Xüsusilə, itirilmiş imkanların bərpası və problemlərin danışıqlar yolu ilə həlli istiqamətində ciddi maneələr mövcuddur.
Hesabatda qeyd olunur ki, ölkənin siyasi sistemində əsas fiqurlar arasında parlament sədri Məhəmməd Baqir Qalibaf və SEPAH-la əlaqəli hərbi rəhbər Əhməd Vəhidi ön plandadır. Bununla belə, onların heç biri təkbaşına qərar qəbul edən lider deyil. Qərarvermə prosesi kollektiv şəkildə həyata keçirilir və SEPAH faktiki olaraq vahid liderlikdən çox, kollegial idarəetmə modeli kimi çıxış edir.
JISS analitikləri vurğulayır ki, İran hakimiyyəti ciddi dilemma ilə üzləşib:
“Ölkə ideoloji prinsiplərindən geri çəkilə bilməz və eyni zamanda ABŞ-ın təzyiqlərinə açıq şəkildə təslim olmaq siyasi baxımdan qəbuledilməz sayılır. Bu səbəbdən Vaşinqtonla təzyiq altında aparılan danışıqlar Tehranda “siyasi intihar” kimi qiymətləndirilir”.
Eyni zamanda, ölkədə sosial-iqtisadi vəziyyətin pisləşməsi daxili sabitliyi zəiflədir. İnternet məhdudiyyətləri nəticəsində milyonlarla iş yerinin itirildiyi, rəqəmsal iqtisadiyyata isə təxminən 1,69 milyard dollar ziyan dəydiyi bildirilir.
Nəticə etibarilə, hesabatda qeyd olunur ki, İran hakimiyyəti nəzarəti qoruyub saxlayır, lakin həm hərbi, həm də iqtisadi potensialını bərpa etmək baxımından ciddi çətinliklərlə qarşı-qarşıyadır.
Tahir Turan
Globalinfo.az
Həmçinin oxuyun
