2006-cı ildən əvvəl işləyən şəxslərin pensiya kapitalının necə hesablanması bir çox vətəndaşı maraqlandırır. Çünki həmin dövrdə ödənilən sosial sığorta haqları deyil, iş stajı əsas götürülərək pensiya kapitalı formalaşdırılır. Qanunvericiliyə görə, 2006-cı il yanvarın 1-dək olan hər il iş stajına görə müəyyən məbləğdə pensiya kapitalı hesablanır və sonradan indeksləşdirilir.
2006-cı ildən əvvəlki iş stajı pensiya kapitalına necə çevrilir? Bu, gələcək pensiyanın məbləğinə necə təsir edir?
Globalinfo.az-a danışan iqtisadçı Elçin Rəşidov deyib ki, 2005-ci ilin sonunadək olan dövr üzrə pensiya hesablanarkən vətəndaşın topladığı pensiya kapitalı yox, iş stajı nəzərə alınır:
“Həmin dövr üçün hər il iş stajına görə 306 manat məbləğində şərti pensiya kapitalı hesablanır. Məsələn, şəxs 2006-ci ilədək yeddi il işləyibsə, onun üçün 7 × 306 manat, yəni 2142 manat pensiya kapitalı müəyyən edilir. 2006-cı ildən sonrakı dövr üzrə isə vətəndaşın fərdi hesabında toplanan və indeksləşdirilən pensiya kapitalı nəzərə alınır. Bu məbləğlər şəxsin fərdi pensiya hesabına əlavə olunur”.
Elçin Rəşidov
İqtisadçı bildirib ki, yaşa görə əmək pensiyası təyin edilərkən fərdi hesabda toplanmış ümumi pensiya kapitalı 144 aya bölünür:
“Bu da 12 illik dövrə uyğun ayların sayıdır. Nəticədə əldə olunan məbləğ vətəndaşın aylıq pensiyasını təşkil edir. Beləliklə, pensiya məbləği hesablanarkən 2006-cı ildən əvvəlki dövr üzrə iş stajına görə hesablanan şərti kapital və 2006-cı ildən sonrakı dövrdə toplanmış faktiki pensiya kapitalı birləşdirilir. Bu səbəbdən, xüsusilə 2006-cı ildən əvvəl uzunmüddətli əmək stajına malik olan şəxslərin pensiya məbləği daha yüksək olur”.
Ləman İmran
Globalinfo.az
Həmçinin oxuyun
