Amerika Birləşmiş Ştatları ciddi təhlükə ilə üz-üzədir.
Globalinfo.az xarici mediaya istinadən xəbər verir ki, bir çox kilometr səthi əhatə edən böyük çatlar və qırılmalar əmələ gəlib.
Ölkənin cənub-qərb bölgələrində, Arizona, Yuta və Kaliforniya kimi ştatlarda nəhəng qırılmalar müşahidə edilib.
Yeraltı sular planetin əsas şirin su mənbələrindən biridir. Onlar bütün içməli suyun yarısını və dünya suvarmasının təxminən 40 faizini təmin edirlər.
Bununla belə, insanlar yeraltı suları Yerin təbii yolla doldura biləcəyindən daha tez çıxarırlar. Bu balansızlıq ciddi fəsadlarla nəticələnir.
Arizona Geoloji Tədqiqat Xidmətindən yer çatı tədqiqatçısı Cozef Kuk vurğulayır ki, hazırda meydana çıxan çatlar “təbiət hadisəsi deyil”. O iddia edir ki, bu, uzun illər insan fəaliyyətinin və onların yeraltı suların çıxarılması cəhdlərinin nəticəsidir.
Bu çatlar yer qabığının gərginliyinə işarədir. Onlar qrunt sularının yoxa çıxması nəticəsində çökmüş böyük əraziləri əhatə edir. Çatlar adətən dağlar arasındakı hövzələrdə baş verir və evlərə, yollara, kanallara, bəndlərə ziyan vurur və nəticədə insan həyatını təhlükə altına alır.
Arizona uzun müddətdir bu problemlə mübarizə aparır və ən azı 2002-ci ildən onun gedişatını izləyir. Arizona Geoloji Tədqiqat Xidmətində xəritədə qeyd edilmiş 169 mil ( 1mil 1,6 km) çat var və bu rəqəm artmaqda davam edir.
