Yeni il günü Nyu-Orleanda törədilən ölümcül terror hücumunun şoku səngiməzdən əvvəl araşdırmanın ilkin əlamətləri ABŞ hüquq-mühafizə orqanlarının və təhlükəsizlik rəsmilərinin çoxdan qorxduğu ssenariyə işarə edir.
Globalinfo.az “Amerikanın səsi”nə istinadən xəbər verir ki, çərşənbə günü Federal Təhlükəsizlik Bürosu (FTB) şübhəlinin polislə atışma zamanı öldürülməzdən əvvəl Burbon küçəsində izdihamın üzərinə sürdüyü yük maşınına İŞİD bayrağı sancdığını təsdiqləyib.
ABŞ prezidenti Co Bayden bildirib ki, o, hücum haqda davamlı şəkildə məlumatlandırılır:
“Ürəyim bayramı qeyd etməyə çalışan qurbanlar və onların ailələrinin yanındadır. Zorakılığın heç bir forması əsaslandırıla bilməz və biz ölkə icmalarına istənilən formada hücumlara qarşı dözümlü olmayacağıq”, Bayden sosial mediada yayılan bəyanatında bildirib.
ABŞ Prezidenti Co Bayden 42 yaşlı ABŞ vətəndaşı və ordunun ehtiyatda olan keçmiş üzvü Şəmsud-Din Cabbarın sosial mediada İŞİD-dən ilhamlandığını göstərən videolar yerləşdirdiyini bildirib.
“Hüquq-mühafizə orqanları və kəşfiyyat icması hər hansı əlaqə, birlik və ya ortaq sui-qəsdçilər axtarmağa davam edir” – deyə, prezident əlavə edib.
İstintaqa Nyu-Orlean və digər ştatların müxtəlif yerlərində axtarış əmrlərinin icrası, Hyustonda yol kəsişməsində FTB və digər hüquq-mühafizə orqanlarının əməkdaşları tərəfindən həyata keçirilən əməliyyat və bu cəhdlə hər hansı əlaqənin olub-olmadığı ilə bağlı suallar daxildir.
Milli Terrorizmlə Mübarizə İnnovasiya, Texnologiya və Təhsil Mərkəzinin məlumatına görə, 2014-cü ildən bəri 250-dən çox şəxs İŞİD ilə əlaqəli fəaliyyətlərdə ittiham olunub.
Polisin bildirdiyinə görə, avtomobili insanların üzərinə sürdükdən sonra sürücü avtomobildən düşüb və polislərə atəş açıb.
Polisin məlumatına görə, zabitlər cavab atəşi açaraq şübhəlini öldürüblər. Polisin bildirdiyinə görə, iki zabit yaralanıb, lakin onların vəziyyəti stabildir.
***
ABŞ-ın Luiziana ştatının Nyu Orlean şəhərində terror aktının təşkilatçısı və icraçısı 2024-cü ilin yayında İŞİD terror təşkilatına qoşulub və hücum zamanı təkbaşına fəaliyyət göstərib.
Globalinfo.az APA-ya istinadən xəbər verir ki, bu barədə FTB-nin direktor müavini Kristofer Raya mətbuat konfransında məlumat verib.
“Yeni Orleandakı hücumda təşkilatçı olaraq başqa kiminsə iştirak etdiyini düşünmürük”, – FTB rəsmisi qeyd edib.
