Dünən xəbər yayıldı ki, metronun “Xocəsən” və “Avtovağzal” stansiyalarına giriş ödənişsiz olacaq və bir ay bu formada davam etməsi gözlənilir.
Onsuz da həmin stansiyalara bir qədər yaxın ərazidə qaldığım üçün düşündüm ki, fürsətdən istifadə edim. Amma metroya çatmaq üçün əvvəlcə təxminən 45 dəqiqə tıxaclı yoldan keçməli oldum.
Nəhayət, metroya çatdıq. Girişlər açıq idi. İki əməkdaş sərnişinlərə “Keçin, pulsuzdur” deyərək məlumat verirdi. Qatarla “Memar Əcəmi” stansiyasına çatdıq, oradan keçid edərək “Dərnəgül” istiqamətində hərəkət etdik və sonuncu stansiya olan “Nizami”yə getdik. Hər zamankından daha tez çatdıq.
Yenə 2 nömrəli avtobusu gözləməli idik ki, işə çataq.
Avtobus gəlmir. Gələn saxlamır. Saxlayan isə
dolu olduğu üçün sərnişin götürmür. “Nizami”dən Xətai istiqamətinə getmək üçün isə başqa real alternativ də yoxdur.
Bəli,
piyada getmək mümkündür. Amma səhər tezdən günün altında təxminən bir saat
yol gedib işə gümrah başlamaq, yumşaq desək, o qədər də real deyil.
Təbii ki,
“Xocəsən” və “Avtovağzal” stansiyalarına ödənişsiz giriş təşəbbüsünü müsbət addım kimi qiymətləndirmək olar. İnsanların alternativ nəqliyyatdan istifadəsini artırmaq və avtomobil sıxlığını azaltmaq baxımından bu cür addımların sınanması başadüşüləndir.Amma sual başqadır: niyə məhz ən çox istifadə olunan və əsas sıxlığın yaşandığı istiqamətlərdə deyil?
Bakıdakı əsas problem “Şamaxinka”, “28 May”, “Memar Əcəmi” və bu istiqamətlərdə yaranan nəqliyyat sıxlığıdır. Əgər məqsəd yollardakı tıxacın azalmasıdırsa, tətbiq edilən alternativin şəhərin əsas sərnişin axınlarına nə qədər təsir edəcəyi də nəzərə alınmalıdır.
Əlaqəli xəbər
Çünki “Xocəsən” və “Avtovağzal”dan istifadə edən sərnişinlərin sayının şəhərin digər əsas
metro istiqamətləri ilə müqayisədə nə qədər olduğu da ayrıca sualdır.
Bir sözlə, təşəbbüs yaxşıdır. Amma təşəbbüsün özü qədər harada və necə tətbiq edilməsi də vacibdir.
Əgər məqsəd həqiqətən Bakı küçələrindəki sıxlığı azaltmaqdırsa, növbəti günlərdə sərnişinlərin əsas hərəkət istiqamətlərini nəzərə alan daha effektiv alternativlərin təqdim olunmasını gözləmək olar.
Çünki metroya pulsuz daxil olmaq yaxşıdır. Amma metrodan çıxandan sonra yenə eyni tıxacın, eyni avtobus probleminin qarşısında qalırsansa, problem sadəcə yerini dəyişmiş olur.
