HƏMAS-ın hücumları nəticəsində İsraildə həlak olan Azərbaycan əsilli şəxslərdən biri də Sumqayıtda doğulub, yaşamış Emin Axundovdur.
Globalinfo.az APA-ya istinadən xəbər verir ki, Emin Axundov Sumqayıtı qurub yaradanlardan olmuş, şəhərin fəxri vətəndaşı Kərim Axundovun nəticəsidir.
Mərhumun ailəsindən hazırda Sumqayıtda yaşayan olmasa da, Emin Axundovun qohumu (babasının bacısı oğlu) Qalib Əliyev ailə haqqında xatirələrini bölüşüb. Q. Əliyev APA-ya bildirib ki, E. Axundovun babası Rəhim və nənəsi Qalina Axundovlar uzun illər Sumqayıtda meteoroloji stansiyada rəhbər vəzifələrdə çalışıblar:
“Atası Oleq Axundov, anası Anna Axundova Emin və bacısı 14 yaşlarında olarkən İsrailə təhsil dalınca gediblər. Emin orada hərbi xidmət keçib və çalışmağa başlayıb.
Eminin atasının bir qardaşı olub. O evlənməyib, 50 yaşlarında ölüb. Atası Oleq Axundov da ailəsi ilə birlikdə İsrailə köçüb. Köçəndən sonra Azərbaycana gəlməyiblər. Buradakı qohumları ilə əlaqələri kəsilib. E. Axundovun anası yəhudi əsilli olub. İsrailə köçməklərinə əsas səbəb də bu olub.
Eminin həlak olması xəbərini eşidəndə öncə bilmədim kimdən gedir söhbət, sonra uşaqlar dedi ki, bizim Emindir rəhmətə gedən. Çox təsirləndim Eminin gənc yaşda dünyasını dəyişməsinə”.
Xatırladaq ki, 36 yaşlı Emin Axundov Beer şəhərində gedən döyüşlərdə həyatını itirib. O, Beer Şeva hərbi qəbiristanlığında dəfn olunub.
Emin Axundov evli olub, iki övladı qalıb.
Qeyd edək ki, HAMAS-ın hücumları nəticəsində İsraildə həlak olan Azərbaycan əsilli şəxslərin sayı 7-yə çatıb.
