Yanvarın 15-də Binəqədi rayonu Abay Kunanbayev küçəsində yerləşən mebel sexində dəhşətli partlayış baş verdi. Hər kəs, lazımi olan hər bir qurum dağıntılar altında qalan insanların köməyinə tələsirdi. Amma təəssüf ki, xəsarət alanları xilas etməyə tələsən Təcili Tibbi Yardım avtomobili Binəqədinin “güllü-çiçəkli” yolunda palçığa batdı. Bunu görən şəxslər dərhal həkimlərin köməyinə qaçdılar.
Burada lap “Turp nağılı” yada düşür. Əlqərəz…
Binəqədinin ara küçələrinin “abad” olduğunu görər-görməz dərhal Binəqədi Rayon İcra Hakimiyyəti ilə əlaqə saxlamağa çalışdıq. Hər zaman olduğu kimi, bu dəfə də zəngimiz və sualımız cavabsız qaldı. İnanırıq ki, görüntülərdən nəticə çıxarıb heç olmasa məhəlləarası yollara asfalt örtüyü çəkərlər.
Binəqədinin icra başçısı Elxan Allahverdiyev bu hadisədən yəqin nəticə çıxarar. Yalnız rayonun görünən küçələrini bəzəməklə iş bitmir. Arxa küçələri, gözdən-könüldən uzaq məhəllələri də səliqəyə salmağın vacibliyini yəqin hörmətli icra başçısı bilməmiş deyil.
Binəqədi bineyi-qədimdən problemli rayondur. Bataqlıqlar, qaz kəmərləri, neft buruqları üzərində minlərlə ev tikilib. Gölməçələri qurudub, ərazini vətəndaşlara satıblar. Ona görə də qurunt suların çıxmağa yeri yoxdur. Bir az yağıntı oldumu, Binəqədinin yolları keçilməz olur. Neçə icra başçısı o bataqlıqdan, o sel-su altından çıxa bilməyib.
Asfaltın yararsız olmasını qoyaq bir kənara, ortaya daha bir sual çıxır. Hadisə baş verən ərazidə olan şahidlər iddia edirlər ki, mebel sexi qaz borusunun ta üzərində tikilib. Yaxşı, bəs qaz borusunun olduğu yerdə tikintiyə kim, hansı qurum icazə verir?
Sirr deyil ki, icra hakimiyyətinin və Fövqaladə Hallar Nazirliyinin icazəsi olmadan daşı daş üstünə qoymaq mümkün deyil. O zaman niyə orada mebel sexi tikilib? Allah etməsin, sabah sexə yaxın binalarda partlayış olarsa, bunun cavabını hansı vicdan sahibi vermiş olacaq?
Təəssüf ki, bütün bu suallarımız FHN və Binəqədi Rayon İcra Hakimiyyəti tərəfindən cavablandırılmadı. Ümid edirik ki, icazə verən qurumlar cəzasız qalmazlar.
Allahdan həyatını itirənlərə rəhmət, xəsarət alanlara isə şəfa diləyirik…
Zaira Akifqızı
Globalinfo.az
