“Deməli, milli komandamız dünən İsveçə 5-0 uduzdu. Qürrələnməli məsələ deyil, amma gərək olanı yazasan. Azərbaycan millisindən düz 18 il bundan əvvəl, 2005-ci il martın 26-da Varşavada keçirilən Polşa-Azərbaycan matçından sonra əlimi üzmüşəm. Həmin oyunda 8-0 hesabı ilə məğlub olduq”.
Globalinfo.az xəbər verir ki, bunu Azərbaycanın Bosniya və Herseqovinadakı səfiri Vilayət Quliyev qeyd edib.
Səfir həmin oyunda Polşanın sabiq müdafiə naziri ilə arasında keçən maraqlı dialoqdan söz açıb:
“VİP lojada Polşanın müdafiə naziri V.Şmaydanovski ilə yanaşı oturmuşduq (2010-cu ildə prezident L.Kaçinski ilə birlikdə təyyarə qəzasında həlak oldu). Qapımıza ikinci qol vurulandan sonra çiynimə toxunub:
-Bu futboldur, – dedi. – Hər dəqiqə hər şey dəyişə bilər.
Dördüncü qol vurulanda isə:
-Futbol boş şeydir, – deyə ürək-dirək verdi. – Əsas odur ki, sevgidə və müharibədə uduzmayasan.
Sonrakı qollar vurulanda daha heç nə demədi. Deyəsən o da oyuna görə xəcalət çəkirdi”.
Səfir oyundan sonra Azərbaycan millisinin əhval ruhiyyəsinin tamam fərqli olmasının diqqət çəkdiyini bildirib:
“Komandanı Varşavaya gətirən çarter reyslə mən də bir neçə günlüyə Bakıya qayıtdım. Təyyarədə futbolçuları müşahidə etmək çox maraqlı idi. Elə bil 8-0 uduzan onlar deyildi. Həvəslə yeyib-içirdilər. Uduzduqları oyundan başqa hər şeydən – dolların kursundan, polyak qızlarından, nə almaqlarından danışırdılar. Yanaşı oturduğumuz məşqçi Şahin Diniyev isə guya özünə haqq qazandırırmış kimi, “Uduzacağımızı bilirdim. Amma day belə hesabla yox…”-dedi.
Uduzmaq əhval-ruhiyyəsi ilə gələn komanda təbii ki, qələbə qazana bilməz. Niyə uduzduğunu özünə dərd eləmirsənsə, səbəblərini axtarmırsansa, növbəti oyunlarda da məğlubiyyətə məhkumsan…
Futbol həm də vətənpərvərlik, milli təəssübkeşlik tələb edir…”
Qeyd edək ki, Azərbaycan millisi AVRO-2024-ün seçmə mərhələsində İsveçə 0:5 hesabı ilə məğlubiyyəti tənqidlərə səbəb olub.
Hazırladı: Ayşən Mustafa
