Bir neçə gündür ki, ölkə mediası qızılca xəstəliyinin yayılmasından danışır. Artıq bu, epidemiya halına gəlib. Məktəblər dezinfeksiya olunsa da, xəstəlik sürətlə yayılmaqdadır. Hətta şagirdlər arasında dünyasını dəyişənlər də var.
Bəs xəstəliyin qarşısını almaq mümkündürmü?
Mövzu ilə bağlı Globalinfo.az-a danışan infeksionist Ləman Qalimova deyib ki, doğrudan da qızılca xəstəliyi sürətlə yayılmağa başlayıb.
Onun sözlərinə görə, xəstəliyin yayılması vaksinasiya olanların sayının az olması ilə bağlıdır:
“Mütləq şəkildə hər kəs vaksin vurdurmalıdır ki, bu vəziyyət daha da qlobal hal almasın. Bəli, virus artıq məktəblərdə də yayılmağa başlayıb. Uşaqlar arasında qızılcaya yoluxub ağır keçirənlərin immun sistemi yoxdur, yəni peyvənd olunmayanlardır.
İnfeksionist qeyd edib ki, onkoloji xəstəlikdən əziyyət çəkənlər, kartikosteroid qəbul edənlər, kimyaterapiya və radioterapiya alan şəxslər və immuniteti zəif olanlar qızılca vaksini vurdura bilməzlər, əks göstərişdir.
İnfeksionist qızılcadan qorunmağın yollarını deyib:
“İnsanlar maska taxaraq, sosial məsafə saxlayaraq və əl gigienasına mütəmadi olaraq riayet edərək özlərini qoruya bilərlər. Uşaqlar mütləq şəkildə vaksinasiya olunmalıdır. Çünki ən ağır keçirənlər böyüklər və həmçinin də vaksinasiya olunmamış azyaşlı uşaqlardır.
Statistika aparsaq görərik ki, infeksiyaların sayında çoxalma var. Buna da səbəb vaksin vurdurmamaqdır. Ümumiyyətlə, hansı infeksiyanın vaksini varsa, özünü qoruya bilmək üçün mütləq şəkildə onu etmək lazımdır”.
Zaira Akifqızı
Globalinfo.az
