Netanyahu Baydenə qarşı: İsraildəki aksiyaları ABŞ maliyyələşdirir?

İsrailin baş nazirinin yaxın ətrafı hesab edir ki, İsraildə Benyamin Netanyahu hökumətinə qarşı keçirilən kütləvi etirazlar xaricdən maliyyələşir.

Globalinfo.az  “APA”ya istinadən xəbər verir ki, bu barədə The Times of Israel məlumat yayıb.

Məlumata görə, hökumət mənbələri, xüsusən də Amerika izindən şübhələnirlər.

Qəzetin yazdığına görə, bu həftə Netanyahunu İtaliyaya səfərdə müşayiət edən yüksək rütbəli İsrail hökumət rəsmisi heç bir dəlil göstərmədən iddia edir ki, ABŞ prezidenti Co Baydenin administrasiyası kütləvi aksiyalar üçün müəyyən maliyyə vəsaiti ayırır.

“Bu etiraz milyonlarla dollarla maliyyələşir və təşkil olunur. Baş verənləri izləyirik. Bu çox yüksək səviyyəli təşkilatdır. Mütəşəkkil bir mərkəz var ki, oradan bütün nümayişçilər sıra ilə çıxırlar. Nəqliyyatı, bayraqları, səhnələri kim maliyyələşdirir? Bizə aydındır” – “The Times of Israel” İsrail rəsmisinin sözlərini sitat gətirir.