Abşeron rayonunun ən böyük yaşayış məntəqələrindən olan Xırdalan şəhərində daşınmaz əmlak bazarı son dövrlərin ən durğun və gərgin mərhələsini yaşayır. Bir vaxtlar paytaxta yaxınlığı və nisbətən ucuz mənzil imkanları ilə alıcıların əsas seçimi olan Xırdalan, artıq bir sıra ciddi infrastruktur və sosial amillər səbəbindən cazibəsini itirməkdədir.
Globalinfo.az “Yeni Sabah”a istinadən xəbər verir ki, mənzil qiymətlərinin ucuzlaşmasında ən birinci və həlledici amil kimi Bakı-Sumqayıt şosesində və Xırdalanın daxili küçələrində yaşanan xroniki nəqliyyat sıxlığı göstərilir. Hər gün işə və təhsilə yollanan sakinlərin saatlarla tıxacda qalması, mərkəzə gediş-gəlişin dözülməz həddə çatması alıcıların bu ərazidən uzaqlaşmasına gətirib çıxarıb. Mənzil almaq istəyən vətəndaşlar artıq eyni büdcə ilə nəqliyyat infrastrukturu daha rahat olan Masazır, Hövsan və ya digər mərkəzəyaxın ərazilərə üstünlük verirlər.
Bununla yanaşı, Xırdalanda xaotik və planlaşdırılmamış tikinti bumu nəticəsində əhalinin sıxlığı həddindən artıq artıb. Bu durum su, kanalizasiya, elektrik və qaz xətlərində müntəzəm kəsintilərə, məktəb və bağçalarda yer çatışmazlığına səbəb olur. Səki və park yerlərinin məhdudluğu, həyətyanı sahələrin azlığı yaşayış komfortunu aşağı salır. Təkrar mənzil bazarında evini satıb daha rahat infrastruktura malik ərazilərə köçmək istəyən sakinlərin sayı artdıqca, satışa çıxarılan evlərin nisbəti də sürətlə çoxalır.
Hazırda bazarda təklif tələbi dəfələrlə üstələyir. Təcili nağd pul ehtiyacı olan və ya mənzilini aylarla sata bilməyən mülkiyyətçilər qiymətlərdə məcburi güzəştlərə gedirlər. Elan saytlarındakı mövcud təkliflərə əsasən, Xırdalanda 2 otaqlı mənzillər sahəsindən və təmirindən asılı olaraq əsasən 80 000 – 120 000 manat aralığında təklif edilir. 3 otaqlı mənzillərin qiyməti təxminən 54 000 – 124 000 manat arasında dəyişdiyi halda, 4 otaqlı mənzillər üçün qiymətlər 129 000 – 149 000 manat təşkil edir.
Müşahidə olunan 10-15% civarındakı geriləmə və qiymət diapazonlarındakı rəqabət məhz təkliflərin həddindən artıq çoxalması ilə əlaqədardır.
Ekspertlərin qənaətinə görə, Xırdalanda nəqliyyat və infrastruktur problemləri konseptual şəkildə həll olunmayana qədər ərazidəki daşınmaz əmlakın likvidliyi aşağı qalacaq və qiymətlərdəki artım potensialı məhdudlaşacaq.
