Bütün ermənilərin katolikosu II Qaregin və daha 6 yepiskop barəsində açılmış cinayət işinə xitam verilməsi üçün vəsatət qaldırılıb.
Globalinfo.az modern.az-a istinadən xəbər verir ki, bunu din xadimlərinin vəkili Ara Zohrabyan sentyabrın 18-də keçirilən məhkəmə iclasında bildirib. Müdafiə tərəfi cinayət təqibinin və icraatın dayandırılması ilə bağlı bir neçə vəsatət təqdim edir.
Zohrabyanın sözlərinə görə, dövlət kimin yepiskop olub-olmamasını müəyyənləşdirmək səlahiyyətinə malik deyil.
“Bu, müstəsna olaraq kilsənin kanonik və daxili məsələsidir”, – vəkil bildirib.
Müdafiə tərəfi hesab edir ki, Ermənistan qanunvericiliyi kilsənin daxili idarəetmə və iyerarxiya məsələlərinə müdaxilə üçün əsas yaratmır. Zohrabyan bundan əvvəl də yepiskopların və digər din xadimlərinin təyin olunmasının Erməni Apostol Kilsəsinin daxili muxtariyyətinə aid olduğunu bildirmişdi.
Cinayət işi II Qareginin Masis yeparxiyasının keçmiş rəhbəri Arman Saroyanın vəzifədən uzaqlaşdırılması ilə bağlı qərarı fonunda başlanıb. İttiham tərəfi katolikosun qüvvəyə minmiş məhkəmə qərarının icrasına mane olduğunu iddia edir. Müdafiə tərəfi isə ittihamı qəbul etmir.
İş üzrə II Qareginlə yanaşı, Ali Ruhani Şuranın üzvü olan altı yepiskop da təqsirləndirilən şəxs qismindədir. Sentyabrın 18-də Eçmiədzində keçirilən ilkin məhkəmə dinləməsində katolikos və yepiskoplar iştirak etməyib, onların maraqlarını vəkillər təmsil edib.
