Müasir dünya “güc” adı altında kobud güc tətbiqinin üstünlük təşkil etdiyi xaos mərhələsinə qədəm qoyur.
Globalinfo.az xəbər verir ki, bunu Türkiyə Prezidenti Rəcəb Tayyib Ərdoğan bildirib. Onun sözlərinə görə, qonşu İrana qarşı hücumlarla başlayan proses bu reallığı bir daha nümayiş etdirir:
“Dünyamız sürətlə kobud gücün tətbiq edildiyi və bunun “güc” kimi təqdim olunduğu bir dövrə daxil olur. Biz bunun yenidən şahidi oluruq”.
Ərdoğan vurğulayıb ki, Türkiyə heç vaxt bölgəyə təsir edən məsələlərdə neytral mövqe tutmayıb. Onun sözlərinə görə, Ankara hər zaman sülhün, sabitliyin, ədalətin, universal dəyərlərin və tərəqqinin tərəfindədir.
“Biz qanunun aliliyinin, həqiqətin və harada olursa-olsun insan həyatının qorunmasının tərəfdarıyıq. Qətl, qırğın, quldurluq və soyqırımı qəbul etmirik”, – deyə Türkiyə Prezidenti qeyd edib.
O əlavə edib ki, illərdir qanun, insan hüquqları və azadlıqlardan danışan bəzi dairələr bu gün həmin dəyərləri görməzdən gəlir və onların pozulmasına bəraət qazandırırlar.
Tahir Turan
Globalinfo.az
