Cəlilabadın Cəfərxanlı kəndində yerləşən Paşatəpə tarixi abidəsində növbəti arxeoloji qazıntılar aparılır.
Globalinfo.az Oxu.az-a istinadən xəbər verir ki, qazıntı işlərinə tarix üzrə fəlsəfə doktoru Vəfa Mahmudova rəhbərlik edir.
V.Mahmudovanın sözlərinə görə, budəfəki qazıntılar zamanı saxsı məmulatların qurudulması üçün istifadə olunmuş tumba, qədim silah anbarı, həmçinin divar qalıqları aşkar edilib. Eləcə də aşkar edilən artefaktlar arasında gildən hazırlanmış 160-a yaxın sapand daşı da var. Bu sapand daşları Neolit dövründə ov və müdafiə məqsədilə istifadə olunub. Bu tapıntılar Azərbaycan arxeologiyası üçün nadir hesab olunur.
Arxeoloq, həmçinin vurğulayıb ki, qazıntılar zamanı təsərrüfat quyuları və erkən əkinçi tayfalarlna aid olan kult məkanı da aşkar edilib.
Hazırda abidədə qazıntı işləri davam edir.
Qeyd edək ki, bu tarixi yaşayış məskəni 9 min əvvələ aiddir. Əvvəlki dövrlərdə aparılan qazıntılar zamanı burada Neolit dövrünə aid saxsıdan, sümükdən və dəvəgözü daşından hazırlanmış çoxsaylı məişət, bəzək əşyaları üzə çıxıb. Həmçinin bu qədim yaşayış məskənində Azərbaycan tarixində ikinci hesab olunacaq atın əhliləşdirilməsi ilə bağlı nümunələr də aşkar edilib.
