Ukrayna Prezidenti Volodimir Zelenski deyib ki, ABŞ-ın Rusiya Prezidenti Vladimir Putinə rəsmi dəstək verməsi tarixi səhv olacaq.
Zelenski bildirib ki, Ukraynada və ABŞ Konqresindəki tərəfdarları arasında narahatlıq doğuran bir sıra qərarlara baxmayaraq, Donald Trampı hələ də müttəfiqi hesab edir:
“Biz ona etibar etmək istəyirik. Ümid edirəm ki, o, qərarlarına yenidən baxacaq. Çünki hesab edirəm ki, bunların hamısı səhv qərarlardır və nə bizə, nə də ABŞ-a fayda verəcək”.
Qeyd edək ki, Tramp cümə günü Konqresin Rusiyaya qarşı qəbul etdiyi yeni genişmiqyaslı sanksiyaları ləğv edib.
Globalinfo.az-a danışan politoloq Züriyə Qarayeva deyib ki, Zelenskinin açıqlaması Kiyevin ABŞ-ın mövqeyindən getdikcə daha çox narahat olduğunu göstərir:
“Onun Trampı hələ də müttəfiq adlandırması və qərarlarını dəyişəcəyinə ümid etdiyini söyləməsi Vaşinqtonla əməkdaşlığı qorumaq cəhdi kimi qiymətləndirilə bilər. Ukrayna üçün əsas təhlükə ABŞ-ın Rusiyaya güzəştlər müqabilində hansı konkret nəticəni əldə edəcəyinin aydın olmamasıdır.
Züriyə Qarayeva
Əgər Moskva hərbi əməliyyatları məhdudlaşdırmadan iqtisadi təzyiqdən azad olarsa, danışıqlarda mövqeyini yumşaltmağa daha az ehtiyac duya bilər. Bu baxımdan, Zelenskinin xəbərdarlığı həm Ukraynanın təhlükəsizliyi, həm də ABŞ-ın müttəfiqləri qarşısında etibarı ilə bağlıdır”.
Z.Qarayeva deyib ki, Trampın oktyabrın 16-dakı qərarı yeni sanksiya paketinin mühüm hissəsinin tətbiqindən imtinanı nəzərdə tutur:
“Əvvəldən qüvvədə olan sanksiyaların hamısını ləğv etmir. Vaşinqton bu qərarı ABŞ-ın milli maraqları ilə əsaslandırır. Lakin siyasi baxımdan belə güzəştlərin nəticəsi Rusiyanın sonrakı davranışı ilə ölçüləcək. Moskva hücumları davam etdirərsə, təzyiqin zəiflədilməsi sülhə xidmət etmək əvəzinə, müharibəni uzatmaq riskini artıra bilər. Ona görə də sanksiyaların yumşaldılması atəşkəsə əməl olunması və hücumların dayandırılması kimi yoxlanıla bilən addımlarla əlaqələndirilməlidir. Əks halda, Vaşinqton həm Rusiyaya təsir imkanlarını zəiflədə, həm də Ukrayna və Avropa tərəfdaşları ilə münasibətlərində etimad itkisi yaşaya bilər”.
Turan Rzayev
Globalinfo.az
