Azərbaycan dünyanı heyrətə salır – Şuşada elə hadisə baş verdi ki…

İşğaldan azad olunmuş ərazilərə “Böyük Qayıdış” planı çərçivəsində məcburi köçkünlərin öz dədə-baba yurdlarına köçü sürətlənib. Hər ay onlarla köç karvanı Qarabağa yola salınır. Qarabağın incisi Şuşaya da ilk köç karvanı çatıb.

Maraqlıdır, “Böyük Qayıdış” planı çərçivəsində növbəti mərhələdə daha hansı proseslərin şahidi olacağıq?

Mövzu ilə bağlı Globalinfo.az-a danışan Milli Məclisin deputatı Vüqar İskəndərov deyib ki, Vətən müharibəsindəki qələbəmiz fonunda dünyada artan nüfuzumuz, Prezident İlham Əliyevin qlobal nüfuzlu lider ampluasında olması gücümüzə güc qatır:

“Azərbaycan” sözü dövlət adında olandan bu günə qədər heç vaxt belə güclü və qətiyyətli olmayıb. Çox maraqlı bir dövrün müasirləriyik. Torpaqlarımızı itirdik, düşmən tapdağından necə uğurla azad etdiyimizin də şahidi olduq. Bu gün Azərbaycan sözün əsl mənasında öz milli maraqlarına söykənən siyasət yeritməklə dünyanı heyrətə salmaqdadır”.

Deputatın sözlərinə görə, işğaldan azad edilmiş bölgələrimizdə böyük miqyasda abadlıq, bərpa, quruculuq işləri gedir:

Vüqar İskəndərov

“Maraqlısı da budur ki, insan kapitalı, maliyyə, güc, qətiyyət elə özümüzünküdür. Bütün bunlar indiki dövrdə dünyanın ən inkişaf edən dövlətinə sürətlə çevrilməkdə olduğumuzdan xəbər verir. Proses asanlıqla reallaşmır. Hər birinə güclü daxili və xarici siyasət, böyük iqtisadi potensial lazımdır.

“Böyük Qayıdış” prosesi də sürətlə davam etməkdədir. Füzulidə, Laçında və digər ərazilərdə ailələr mərhələli şəkildə evlərinə qayıtmaqdadırlar. Həmin ərazilərdə vacib infrastruktur layihələri icra olunur. İnsanların məşğulluq məsələsi də öz həllini tapır. “Böyük Qayıdış” digər işğaldan azad edilmiş şəhər və kəndlərimizə də şamil olunur. Qarabağın incisi sayılan Şuşaya ilk köç karvanı yola düşdü. İnsanlar burada öz gələcək həyatlarını layiqli şəkildə quracaqlar. “Böyük Qayıdış” konsepsiyası sürətlə davam edir. Qarşıdakı illərdə yüz minlərlə insanı öz evlərinə köçürməliyik”.

Vüqar İskəndərov Azərbaycanın sözügedən layihələri uğurla davam etdirdiyini bildirir:

“Bütün dünyanın gözü qarşısında erməni vandalları tərəfindən yerlə yeksan edilmiş Qarabağ, Şərqi Zəngəzur bölgələri cənnətə çevrilməkdədir. Tayı-bərabəri olmayan ağıllı kənd, ağıllı şəhər konsepsiyası da icra olunur. Müasirlik və qədimliyin vəhdəti nəzərə alınmaqla ərazilərimizin gələcək turizm potensialı indidən diqqətdə saxlanılır. Hər sahədə böyük, gələcəyə hesablanmış işlər görülür”.

Milli Məclisin deputatı Kamilə Əliyeva isə vurğulayıb ki, Şuşa bütün azərbaycanlıların qürur mənbəyi, Mədəniyyət paytaxtımızdır:

“Şuşa həm də türk dünyası, ümumiyyətlə, islam dünyası üçün əziz şəhər, mədəniyyət ocağıdır. Prezident İlham Əliyev 10 may tarixində ulu öndər Heydər Əliyevin 101-ci doğum günündə şuşalılarla yanaşı bütün xalqımıza tarixi bir gün yaşatdı. 32 ildən sonra şuşalılar öz doğma yurd yerinə – Şuşa şəhərinə döndülər. Prezident İlham Əliyev Şuşa şəhərinə köçmüş ilk sakinlərlə görüşdü və Şuşanın azad edilməsində Azərbaycanın əsgər və zabitlərinin göstərdiyi igidlikdən, 32 il əvvəl Şuşanın işğal səbəbi barədə çıxış etdi.

Kamilə Əlieva

Şuşanı işğaldan azad edən əsgərlərimiz dünya hərb tarixinə yazılan böyük igidlik göstərmişdilər. Ümumiyyətlə, Azərbaycan Ordusu Qarabağ və Şərqi Zəngəzurun azad edilməsində şücaət göstərdi, düşmən azərbaycanlıların sarsılmaz  ruhunu, əzəmətini gördü”.

Deputatın sözlərinə görə, bu gün artıq Şuşa şəhəri öz əvvəlki tarixi görkəmini saxlamaqla ən müasir formada yenidən qurulur:

“Yeni yaşayış kompleksləri salınır, infrastruktur yenidən qurulur, ermənilərin dağıtdıqları, təhqir etdikləri məscidlərimizin bir hissəsi öz əvvəlki görünüşlərini saxlamaqla yenidən inşa edilir, qalan məscidlərimiz də təmir etdirilir. Buraya qayıdan sakinlərin məşğulluq məsələsi də öz həllini tapır. Qarabağ və Şərqi Zəngəzur dünyanın ən gözəl məkanına çevrilir. Bu, Azərbaycanın iqtisadi cəhətdən güclü dövlət olmasının nümunəsidir. Azərbaycan bu inkişaf, tərəqqi yoluna Heydər Əliyev hakimiyyətə gəldikdən sonra qədəm qoydu. Bu gün isə o inkişaf, tərəqqi Qarabağda davam edir”.

Qeyd: Yazı Azərbaycan Respublikasının Medianın İnkişafı Agentliyinin maliyyə dəstəyi ilə hazırlanıb.

Mövzu: İşğaldan azad olunmuş ərazilərə “Böyük Qayıdış”;

Safura Bənnayeva
Globalinfo.az