“Qətərlə bağlı qalmaqal Avropanı silkələyib. Avropa Parlamentinin bir qrup deputatının lobbi çalışmaları qarşılığında Qətərdən milyonlarla avro pul aldıqları aşkarlanıb, həbs olunanlar var. Bu hadisə ABŞ Konqresində baş versəydi, nə qalqamal, nə də həbs olardı. ABŞ-də lobbiçilik qanuniləşdirilib, pullar bank hesabları vasitəsilə köçürülür. Avropada isə pullar köhnə üsulla əldən-ələ verilib”.
Globalinfo.az xəbər verir ki, bu sözləri politoloq Elxan Şahinoğlu deyib.
Onun sözlərinə görə, ABŞ Konqresindən fərqli olaraq Avropa Parlamentində lobbiçilik rəsmiləşdirilməyib, pul və bahalı hədiyyələr almaq qadağandır:
“Yayılan xəbərlərə görə, Doha futbol üzrə dünya çempionatının Qətərdə keçirilməsinin müsbət imicinin yaradılması məqsədilə avropalı deputatlara maliyyə verib. Ancaq son qalmaqal fonunda müsbət imic mənfiyə çevrilib.
Avropa Parlamenti Qətərlə müxtəlif səviyyələrdə təmasları dayandırmaq fikrindədir. Bu, ikitərəfli münasibətlərə mənfi təsir edəcək. Məsələ burasındadır ki, Ukrayna müharibəsi fonunda Avropa Rusiya qazından imtina edib. Avropa ölkələrinin alternativ enerji mənbələrinə ehtiyacı var. Avropa şirkətləri bir müddətdir sıxılmış qazın idxalının artırılması məqsədilə Qətərlə danışıqlar aparırlar. Ancaq Doha indiki vəziyyətdə Avropaya qaz nəqlinin artırılması planlarına yenidən baxa bilər. Qətərli rəsmilər həm də ondan narazıdırlar ki, son qalmaqalda ancaq onların ölkələrinin adı hallanır, halbuki başqa ölkələr də Avropa Parlamentində lobbiçilk edirlər”.
Ekspertin sözlərinə görə, bu məsələdə qətərli rəsmilər haqlıdırlar:
“Misal üçün Avropa Parlamentinin Azərbaycan əleyhinə qəbul etdikləri müxtəlif sənədlərin və bəyanatların arxasında erməni lobbisinin maliyyəsi dayanır. Elə bir qrup amerikalı konqresmen də Ermənistana və Qarabağdakı separatçılara böyük pullar müqabilində dəstək verirlər. Böyük ehtimalla rüşvətə görə həbs olunan Avropa Parlamentinin sədr müavini Evu Kayli Qətərlə yanaşı, pul müqabilində Ermənistana və erməni separatçılarına da lobbiçilik edib.
Son qalmaqala baxmayaraq, Avropa Qətərdən qaz almaq istəyindən vaz keçməyib. “Rüşvət və qaz nəqli ayrı-ayrı məhfumlardır” deyən avropalı rəsmilərin Rusiya qazından imtinaları qarşılığında Qətər qazına ehtiyacları var. Qətər ABŞ-dən sonra Avropaya sıxılmış qaz ixrac edən ikinci ölkədir”.
Turan Rzayev
Globalinfo.az
