Ermənistan və Polşa arasında hərbi-texniki əməkdaşlığa dair saziş imzalanıb.
Globalinfo.az xəbər verir ki, sənədi Ararat Mirzoyan və Vladislav Kosinyak-Kamış imzalayıblar.
Sazişin imzalanma mərasimi Ermənistan nümayəndə heyətinin Polşaya rəsmi səfəri çərçivəsində baş tutub. Nümayəndə heyətinə ölkənin baş naziri Nikol Paşinyan rəhbərlik edib.
Məlumata əsasən, sənəd iki ölkə arasında hərbi-texniki sahədə əməkdaşlığın genişləndirilməsini, müdafiə sənayesi üzrə təcrübə mübadiləsini və təhlükəsizlik istiqamətində qarşılıqlı əlaqələrin gücləndirilməsini nəzərdə tutur.
Qeyd edək ki, Polşa 1999-cu ildən NATO üzvüdür və alyansın kollektiv müdafiə və hərbi əməkdaşlıq təşəbbüslərində fəal iştirak edir. Ermənistan isə rəsmi olaraq KTMT üzvü olsa da, ölkə rəhbərliyi 2024-cü ildən təşkilatın fəaliyyətində iştirakını dondurduğunu açıqlayıb.
Ekspertlər hesab edirlər ki, bu saziş Ermənistanın təhlükəsizlik siyasətində yeni tərəfdaşlıqlar axtardığını göstərən növbəti addım kimi qiymətləndirilə bilər.
Əliyar Xəlil
