“2024-cü ilin dövlət büdcəsinin gəlirlərində qeyri-neft mənbələrindən daxilolmaların 3,1 faiz artması, Azərbaycanda iqtisadi artımın getdikcə qeyri-resurs sektoruna əsaslandığını göstərir”.
Globalinfo.az xəbər verir ki, bu fikirləri Milli Məclisin bu günkü plenar iclasında deputat Vüqar Bayramov deyib.
Deputatın sözlərinə görə, ötən il qeyri-neft sektorundan dövlət büdcəsinə proqnozla müqayisədə 573,4 milyon manat artıq olmaqla ümumilikdə 19 milyard 192 milyon manat vəsait daxil olub:
“Hesabatda qeyri-neft sektorundan daxilolmaların yüksək olması, ümumi daxili məhsulun (ÜDM) artım tempinin proqnozu üstələməsi ilə izah olunur. Belə ki, 2024-cü ildə ÜDM real ifadədə 4,1 faiz artaraq, nominal olaraq 121,3 milyard manat proqnoza qarşı 126,3 milyard manat təşkil edib. Yəni, əvvəlki gözləntilərlə müqayisədə iqtisadiyyatda əlavə 5 milyard manatlıq ÜDM formalaşıb. Bu, əlbəttə ki, müsbət göstəricidir və iqtisadi inkişafın göstəricisi kimi qiymətləndirilə bilər. Bu fakt, iqtisadi artımın fiskal gəlirlərə müsbət “spillover” effekti yaratdığını göstərir”
Safura Bənnayeva
Globalinfo.az
