Oslo bölgəsindəki məscidlər təhdid edildikdən sonra Norveçdə polisə silahlanma əmri verilib.
Globalinfo.az xəbər verir ki, sosial şəbəkələrdə “Discord” platformasında istifadəçinin dərc etdiyi postun görüntüləri yayılıb.
“Bu yazının arxasında kimin durduğunu müəyyən etməyə çalışırıq”, – deyə Polis Təhlükəsizlik Xidmətindən Martin Bernsen bildirib.
Məlumata görə, istifadəçi Norveçin adının çəkildiyi qeydin yer aldığı odlu silahın şəklini dərc edib. Yazıda, həmçinin üç fərqli məscidin ünvanları olan xəritə də var. İstifadəçinin adı müəllifin müsəlmanlara qarşı zorakılıq etmək niyyətində olduğuna işarə edir, avatarda isə 2019-cu ildə Yeni Zelandiyadakı iki Kraystçerç məscidində 51 müsəlmanı öldürən terrorçu Brenton Tarrant təsvir olunub. Bernsenin sözlərinə görə, bu, polisin bu işi araşdırmaq qərarına gəlməsinin səbəblərindən biridir.
Şənbə günü günorta saatlarında silahlı polis Oslonun mərkəzindəki Toyen küçəsindəki İslam Mədəniyyət Mərkəzi məscidi (İMM) yaxınlığında növbə çəkib.
“Öz ibadət evində özünü təhlükəsiz hiss edə bilmək imkanının olmaması çox kədərlidir. Bir çox insan məscidə getmək və dua etmək istəyir, bu, Ramazan ayında xüsusilə vacibdir”, – deyə İMM nümayəndəsi Ayuşa Umme Avan vurğulayıb.
Baş nazir Yonas Gar Störe formasından asılı olmayaraq bütün təhdidlərin qəbuledilməz olduğunu bildirib. “Norveçdə hər kəsin öz dininə etiqad etməsi təhlükəsiz olmalıdır. Bir çox müsəlman üçün Ramazan birlik, həmrəylik və minnətdarlıq vaxtıdır. Daxil olan təhdidlər bununla kəskin şəkildə ziddiyyət təşkil edir. Norveçdə bu, yolverilməzdir”, – deyə Baş nazir bildirib.
