BMT-nin Baş katibi Antonio Quterreş İran və Pakistanı vəziyyətin daha da gərginləşməsinin qarşısını almaq üçün təmkinli olmağa çağırıb.
Globalinfo.az xəbər verir ki, bu barədə BMT baş katibinin rəsmi nümayəndəsi Stefan Düjarrik deyib.
“Baş katib İran və Pakistan arasında son hücumlarından son dərəcə narahatdır. O, hər iki ölkəni vəziyyəti daha da gərginləşməmək üçün maksimum təmkinli olmağa çağırır”, – bəyanatda vurğulanıb.
Bildirilib ki, İran və Pakistan arasında təhlükəsizlik məsələsi suverenlik, ərazi bütövlüyü və mehriban qonşuluq münasibətlərinin prinsiplərinə uyğun olaraq sülh, dialoq və əməkdaşlıq yolu ilə həll edilməlidir.
Xatırladaq ki, Pakistan Silahlı Qüvvələri Tehranın analoji hücumundan bir gün sonra İran ərazisinə raket zərbələri endirib. İslamabad bildirib ki, hücumda “anti-Pakistan silahlı qrupları” hədəf alınıb. İran hakimiyyətinin məlumatına görə, Sistan və Bəlucistan əyalətində baş verən partlayışlar nəticəsində 9 nəfər həlak olub.
