Xəbər verdiyimiz kimi, OPEC+ ölkələri dekabr ayı üçün gündəlik neft hasilatını əlavə 137 min barel artırmaq barədə razılığa gəlməyi planlaşdırır. Bildirilir ki, məqsəd qiymətləri kəskin dəyişmədən tənzimləməkdir. Bu addımın bazarda sabitliyə xidmət edib-etməyəcəyi isə sual doğurur.
Bu qərar qlobal neft bazarına necə təsir göstərə bilər?
Globalinfo.az-a danışan iqtisadçı Elçin Rəşidov deyib ki, bu qərarın məqsədi qiymətləri dəyişmək yox, sabitliyi qorumaqdır:
“Bu, çox kiçik hasilat artımıdır və son 2-3 ayda tətbiq edilən addımların davamıdır. Yanvar-mart ayları üçün əlavə artım nəzərdə tutulmur və hasilatın sabit saxlanması planlaşdırılır. Yalnız geosiyasi və bazar tələbində ciddi dəyişikliklər olarsa, qərara yenidən baxıla bilər”.
Elçin Rəşidov
İqtisadçı bildirib ki, neft bazarında uzunmüddətli qiymət sabitliyi həm alıcı və satıcıların, həm də anbar, birja və digər enerji sektoruna bağlı sahələrin planlamasını asanlaşdırır:
“Bu, neftə xidmət göstərən və neft məhsullarından istifadə edən şirkətlər, eləcə də qlobal enerji bazarı üçün mühüm əhəmiyyət daşıyır. Bununla belə, bazarda qiymət sabitliyini poza biləcək başqa amillər də mövcuddur. OPEC+ daha çox mövcud şəraitə reaksiya verən mexanizm kimi çıxış edir və prosesləri proaktiv şəkildə formalaşdırmaq imkanları məhduddur”.
Ləman İmran
Globalinfo.az
Həmçinin oxuyun
