ABŞ və İran arasında gərginlik fonunda tərəflərin diqqəti müvəqqəti razılaşmaya yönəlib. Məqsəd isə İranın nüvə proqramı ilə bağlı ciddi fikir ayrılıqlarının davam etdiyi bir şəraitdə mümkün münaqişənin yenidən alovlanmasının qarşısını almaqdır.
Globalinfo.az xəbər verir ki, bu barədə “Reuters” agentliyi məlumat yayıb.
Nəşr bildirir ki, son günlərdə keçirilən danışıqlarda tərəflər müəyyən irəliləyiş əldə etsələr də, əsas məsələlər hələ də açıq qalır. Xüsusilə, ötən həftəsonu İslamabadda baş tutan görüşlər nəticəsiz yekunlaşıb. Danışıqlar zamanı yüksək zənginləşdirilmiş uranın taleyi və İranın nüvə fəaliyyətini nə qədər müddətə məhdudlaşdırmalı olduğu ilə bağlı ciddi mübahisələr davam edib.
Yüksək vəzifəli İran rəsmisi bildirib ki, bəzi sahələrdə, o cümlədən Hörmüz boğazının tənzimlənməsi ilə bağlı məsələlərdə müəyyən irəliləyiş var. Bununla belə, tərəflər arasında əsas fikir ayrılıqları hələ də həll olunmayıb.
Mənbələrin sözlərinə görə, İran yeni memorandumun imzalanmasına çalışır. Bu sənədə əsasən, ölkənin dondurulmuş aktivlərinin azad edilməsi qarşılığında Hörmüz boğazından daha çox gəminin keçidinə şərait yaradılması nəzərdə tutulur. Müzakirə olunan təkliflərə görə, daha geniş razılaşma əldə edilsə, gəmilər bu strateji su yolundan daha az risklə yararlana biləcəklər.
Ekspertlər hesab edir ki, tərəflər arasında müvəqqəti razılaşma əldə olunsa, bu, regionda gərginliyin azalmasına və enerji bazarlarında sabitliyin qorunmasına müəyyən töhfə verə bilər. Bununla yanaşı, əsas nüvə məsələləri həll edilmədən uzunmüddətli razılaşmanın əldə olunması hələ də sual altındadır.
Əliyar Xəlil
Həmçinin oxuyun
