Türkiyənin xarici işlər naziri Hakan Fidan aprelin 2-də Parisə səfər edəcək.
Globalinfo.az xəbər verir ki, XİN başçısının səfər zamanı Fransanın Avropa və xarici işlər naziri Jan-Noel Barro ilə görüşü nəzərdə tutulub.
Məlumata görə, səfər çərçivəsində keçiriləcək görüşlərdə Hakan Fidanın gündəmə gətirəcəyi məsələlər arasında Türkiyə-Fransa əlaqələri ilə yanaşı, regional və beynəlxalq hadisələr də müzakirə olunacaq. Həmçinin xüsusilə Türkiyə-Avropa İttifaqı (Aİ) münasibətləri, əlaqələr arasındakı süni maneələrin aradan qaldırılması, o cümlədən bəzi ittifaq dövlətləri tərəfindən ölkədaxili siyasətə alət edilən bu məsələyə strateji prizmadan yanaşmağın vacibliyi, Avropa ölkələri, o cümlədən Fransadan bununla bağlı qərarlı addımların gözlənildiyi kimi mövzular da gündəlikdə yer alır.
Nazir Fidanın danışıqlar zamanı Fransada yaşayan Türkiyə vətəndaşlarını hədəf alan irqçi və ekstremist hadisələrə qarşı ölkəsinin qətiyyətli mövqeyi və bununla bağlı gözləntilərini də vurğulaması nəzərdə tutulur.
Görüşlərdə həmçinin Türkiyənin Fransa ilə ticarət həcminin və qarşılıqlı investisiyaların artırılmasını dəstəklədiyi, bir sıra sahələrdə tərəfdaşlıqların artırılması, ixrac məhdudiyyətlərinin aradan qaldırılması, terrorla mübarizədə səmərəli əməkdaşlıq, bununla bağlı ortaq və qətiyyətli mövqeyin əhəmiyyəti, Rusiya-Ukrayna və İsrail-Fələstin qarşıdurmaları, eləcə də Suriyadakı son hadisələr müzakirə olunacaq.
