Rusiyanın iki rəsmisi Ermənistanı ard-arda hədələdilər. Rusiya Federasiya Şurasının Beynəlxalq Əlaqələr Komitəsinin sədri Konstantin Kosaçev deyib ki, Ermənistan Qərblə məsuliyyətsiz yaxınlaşmanın hansı risklərə gətirib çıxaracağını anlamalıdır.
“Eyni taleyi Ermənistan üçün arzulamırıq. Ona görə də ya indiki rəhbərlik bu riskləri dərk edəcək və son anda dayanacaq, ya da indiki rəhbərlik üçün yumşaq desək, hər şey çətin olacaq” – Konstantin Kosaçev bildirib.
Bu, əməli fəaliyyətə keçə bilərmi? Rusiya Ermənistana hansı hökmü çıxara bilər?
Globalinfo.az -a danışan siyasi şərhçi Kənan Novruzov deyib ki, əslində bu ritorika qarşılıqlıdır:
“Məsələn, Ermənistan Təhlükəsizlik Şurasının katibi Armen Qriqoryan deyib ki, Ermənistanla Rusiya arasında təhlükəsizlik və hərbi əməkdaşlıq sahəsində münasibətlərdə gələcək proseslər Moskvanın mövqeyindən asılıdır. Onun sözlərinə görə, Ermənistana silah və hərbi texnikanın tədarük strukturunda Rusiyanın payı əvvəlki 96 %-lik göstərici ilə müqayisədə xeyli azalıb və hazırda 10 %-dən də aşağıdır. A.Qriqoryan əlavə edib ki, bu, Rusiyanın özünün verdiyi qərarla baş verib.
Məlum olduğu kimi, Moskva ilə İrəvan arasında münasibətlər son bir neçə ildir ki, pisləşən templə davam edir. Bunun əsas səbəbi Ermənistanın mövcud hakimiyyətinin Qərbmeyilli siyasət yeritməsidir. Ermənistan ABŞ və Fransa kimi Qərb ölkələri ilə yaxınlaşmaqla Rusiyadan uzaqlaşır. Bu isə o deməkdir ki, Ermənistan Rusiyanın əvəzinə, Qərbin Cənubi Qafqaza gəlməsinə şərait yaradır. Bu, Kremlin maraqlarına uyğun deyil”.
Kənan Novruzov
Ekspert deyib ki, A.Qriqoryanın dediklərindən bu nəticəyə gəlmək olar ki, münasibətlərin pisləşməsinin səbəbkarı Rusiyadır:
“Halbuki bu tendensiya Moskvadan çox İrəvanın mövqeyinə görədir. Belə ki, Rusiya tarix boyu həmişə Ermənistana özünün “arxa bağçası” kimi baxıb və regional maraqları naminə bu dövlətdən istfadə edib. Amma Ermənistanda Qərbmeyilli Nikol Paşinyan hakimiyyətə gələndən sonra durum dəyişməyə başladı, tərəflər arasında “soyuq küləklər əsdi”. İndi isə bu “küləklər” tədricən “fırtınaya” çevrilir.
Dediyimiz kimi, bunun səbəbi Paşinyan hakimiyyətə gələndən sonra Ermənistanın xarici siyasət kursundakı dəyişiklikdir. Rusiya isə buna adekvat cavab verir. Yəni iki dövlət arasında münasibətlərin pisləşməsinin əsas səbəbkarı məhz rəsmi İrəvandır”.
K.Novruzov deyib ki, Ermənistan Təhlükəsizlik Şurasına istinad etsək, münasibətlərin normallaşması üçün Rusiya hansısa addım atmalıdır:
“Armen Qriqoryana görə, bu, yəqin ki, Rusiyanın Ermənistanın Qərblə yaxınlaşmasına göz yummasıdır. Bu isə o deməkdir ki, Moskva Cənubi Qafqazla bağlı maraqlarından imtina etməlidir. Bu isə real deyil.
Qriqoryanın silah və hərbi texnika tədarükü ilə bağlı dediklərinə gəldikdə isə qeyd etməliyik ki, əvvəllər bu sahədə Ermənistanın əsas partnyoru Rusiya idisə, indi Fransa və Hindistandır. Məhz hərbi sahədə əməkdaşlıq Ermənistanı adıçəkilən dövlətlərdən, xüsusilə Fransadan daha çox asılı vəziyyətə salır.
Nikol Paşinyan hazırda Rusiya üçün o qədər də arzuolunan fiqur deyil. Amma fikrimizcə, Kreml hələ ki, onun hakimiyyətdən getməsini istəmir. Əks halda bunu çoxdan bu və ya digər formada edərdi. Yəqin ki, rəsmi Moskva lazımi vaxtda müvafiq addımı atacaq”.
Turan Rzayev
Globalinfo.az
