İyunun 28-də Milli Məclis buraxıldı. Növbədənkənar seçkilər 2024-cü il 1 sentyabr tarixinə təyin olundu.
Müstəqillik tarixində ilk dəfə olaraq parlament seçkiləri işğaldan azad edilən ərazilərdə keçiriləcək. Bununla belə bəzi suallar yaranır:
İşğaldan azad edilən ərazilərdə seçkilər necə keçiriləcək? Qarabağa və Şərqi Zəngəzura köçürülən vətəndaşlar burada səs verəcək? Hələ köçürülməyən vətəndaşlar hansı seçki məntəqələrində iradələrini ifadə edə biləcəklər?
Globalinfo.az – a danışan deputat Hikmət Babaoğlu deyib ki, ölkəmizdə keçirilən hər bir seçki demokratik hadisədir:
“VII çağırış seçkilərin keçirilməsi yaddaqalan hadisə kimi tarixə düşəcək. Bu seçkinin Azərbaycan parlamentarizm tarixinə yazılmasının bir digər səbəbi də ilk dəfə bütün inzibati ərazilərimizdə keçiriləcək olmasıdır.
![](https://cdn.globalinfo.az/2022/12/hikmet-babaoglu-900x533.jpeg)
Bu seçkilər daxil olmaqla, bundan sonra vətəndaşlarımız işğaldan azad edilən ərazilərdə səs verə biləcək. Yəni məcburi köçkünlər ata-baba yurdlarında – Laçında, Ağdamda, Ağdərədə, Əsgəranda və digər ərazilərdə səs verəcəklər.
Bundan başqa, VII çağırış seçkilərində partiyalar, onların namizədləri torpaqlarımızı işğaldan azad etmək, məcburi köçkünlərin ata-baba yurdlarına qayıtmaq sözü vədi verməyəcək. Hesab edirəm, bu və digər məqamlar növbədənkənar parlament seçkilərini yaddaqalan edəcək”.
Turan Rzayev
Globalinfo.az