Azərbaycanın İsraildən 235 milyon dollar dəyərində raket-artilleriya sistemləri alacağı bildirilir. Müqavilənin üç il ərzində həyata keçirilməsi nəzərdə tutulur.
Bəs bu silahların alınması Azərbaycanın müdafiə imkanlarına və regiondakı hərbi balansına necə təsir göstərəcək? Azərbaycanın silahlanmanı davam etdirməsini zəruri edən amillər hansılardır?
Globalinfo.az-a danışan Ədalət Partiyasının sədri, siyasi şərhçi Mütəllim Rəhimli deyib ki, Azərbaycanın İsraildən 235 milyon dollar dəyərində raket-artilleriya sistemləri alması ölkənin müdafiə qabiliyyətinin artırılması baxımından mühüm addımdır.
“Məlumatlara görə, müqavilə üç il ərzində həyata keçiriləcək. Müqavilə reaktiv yaylım atəşi sistemlərinin və 80 kilometrədək məsafədə yerləşən hədəfləri yüksək dəqiqliklə vurmaq imkanına malik raketlərin alınmasını nəzərdə tutur.
Bu silahların alınması Azərbaycana uzaq məsafələrdəki hədəflərə dəqiq zərbələr endirmək imkanı verə bilər. Eyni zamanda, onlar təhlükələrə operativ cavab verməyə və mümkün hərbi qarşıdurma zamanı çəkindiricilik potensialını artırmağa xidmət edə bilər.
Müasir döyüş şəraitində qələbə qazanmaq üçün təkcə canlı qüvvə və zirehli texnika kifayət etmir. Dəqiq idarə olunan raketlər, pilotsuz uçuş aparatları və müasir elektron idarəetmə sistemləri də mühüm əhəmiyyət daşıyır. Yeni sistemlər Azərbaycan Ordusunun əməliyyat imkanlarını genişləndirə bilər.
Mütəllim Rəhimli
Silahlanma zərurəti, ilk növbədə, Cənubi Qafqazda təhlükəsizlik mühitinin mürəkkəbliyi, Ermənistanla münasibətlərdə davamlı sülhün təmin olunması istiqamətində qarşıda duran məsələlər, eləcə də region dövlətlərinin hərbi potensiallarını artırması ilə bağlıdır. Azərbaycanın 2020-ci il müharibəsindən sonra əldə etdiyi hərbi üstünlüyü qoruması, mümkün təhdidlərə hazır olması və yeni texnologiyalara uyğunlaşması strateji əhəmiyyət daşıyır”.
M.Rəhimli deyib ki, bu silahların alınması Azərbaycanın müdafiə qabiliyyətinin gücləndirilməsinə və regionda təhlükəsizliyin qorunmasına töhfə verə bilər:
“Bununla belə, yeni sistemlərin real təsiri onların sayından, döyüş hazırlığından və digər silahlarla inteqrasiyasından asılı olacaq. Əsas məqsəd yalnız hərbi üstünlük qazanmaq deyil, həm də mümkün təcavüzün qarşısını ala biləcək çəkindiricilik potensialı formalaşdırmaqdır”.
Turan Rzayev
Globalinfo.az
Həmçinin oxuyun
