Pakistanın Baş naziri Məhəmməd Şahbaz Şərif tərəfindən qlobal neft qiymətlərinin artımının əhalinin gəlirlərinə təsirini azaltmaq məqsədilə xüsusi yardım proqramı həyata keçirilir.
Globalinfo.az xarici mediaya istinadən bildirir ki, proqram çərçivəsində motosiklet, rikşa və çinqi sahiblərinə həftədə 500 Pakistan rupisi məbləğində yanacaq yardımı göstərilir.
Yardımdan yararlanmaq üçün minimum yanacaq alışına dair hər hansı tələb müəyyən edilməyib. Mühərrik həcmi 800 kubsantimetrədək olan avtomobillərin sahiblərinə isə hər 10 gündə 10 litr yanacağa görə hər litrə 100 rupi güzəşt tətbiq olunur. Proqramda qeydiyyat pulsuz və rəqəmsal formada həyata keçirilir. Vətəndaşlar 9771 qısa nömrəsinə SMS göndərməklə qeydiyyatdan keçə, daha sonra yanacaqdoldurma məntəqəsinə müraciət etməzdən əvvəl yanacaq jetonu əldə edə bilərlər.
Pakistanın İnformasiya Texnologiyaları Nazirliyi tərəfindən nazir Şaza Fatimə Xavacanın rəhbərliyi ilə hazırlanmış sistemdə sui-istifadə hallarının qarşısının alınması məqsədilə vətəndaşın kompüterləşdirilmiş milli şəxsiyyət vəsiqəsi məlumatları, SIM kartı, nəqliyyat vasitəsi və yanacaq jetonu bir-biri ilə əlaqələndirilir. Proqramın icrasına sutka ərzində fəaliyyət göstərən monitorinq otağı vasitəsilə nəzarət olunur.
Federal nazir Attaullah Tararın rəhbərlik etdiyi İnformasiya və Yayım Nazirliyi isə proqram barədə əhalinin məlumatlandırılması və yardımın hədəf qruplara çatdırılması istiqamətində fəaliyyət göstərir.
Bu məqsədlə ölkə üzrə televiziya, radio, çap və rəqəmsal media vasitəsilə geniş maarifləndirmə kampaniyası aparılır. Yanacaqdoldurma məntəqələrində fəaliyyət göstərən gənclərdən ibarət qruplar vətəndaşlara qeydiyyat və yanacaq jetonlarından istifadə prosesində kömək edir, yaranan problemləri yerindəcə həll edirlər.
Nazirliyin Xarici İctimaiyyətlə Əlaqələr bölməsi də proqramdan yararlanan vətəndaşların rəylərini və təcrübələrini ictimaiyyətə təqdim edir.
Baş nazir Məhəmməd Şahbaz Şərif proqramın icrasına şəxsən nəzarət edir. Proqram çərçivəsində həyata keçirilən dəyişikliklər, o cümlədən güzəştdən yararlana bilən nəqliyyat vasitələrinin yaş həddinin 15 ildən 20 ilədək artırılması, vətəndaşların müraciət və rəyləri nəzərə alınmaqla həyata keçirilib.
