Almaniya Azərbaycanlıları Alyansının rəhbəri, Almaniya-Azərbaycan Radioloji və Neyroradioloji Cəmiyyətinin sədri, tibb elmləri doktoru, dosent Nuran Abdullayev yüksək vəzifəyə təyin olunub.
Globalinfo.az xəbər verir ki, bu barədə məlumatı özü ictimailəşdirib.
N.Abdullayev bildirib ki, sabahdan (2023-cü ilin yanvar ayının 1-dən) fəaliyyətinə Almaniyanın Reyn-Zig bölgəsində klinika direktoru olaraq davam edəcək.
“Almaniyanın 33 yaşında bu vəzifəyə təyin olunan ən gənc klinika rəhbəri (Chefarzt) oldum. Bu bir tarixdir. Almaniyanın üçüncü ən böyük – 600 min əhalisi olan bir bölgəsinə (der drittgrößte Landkreis) cavabdeh olan klinikanın rəhbəri olmaqla o bölgədə yeni texnologiya və innovativ üsullarla radioloji və neyroradiolji diaqnostik və müalicə metodlarının inkişafı və insult xəstələrinə göstərilən tibbi xidmətin ən üst səviyyəyə çatdırılması kimi çox önəmli bir missiya Almaniyada mənə həvalə olunub. Klinika və oradakı məqsədlərimiz barədə ətraflı Almaniya mətbuatı yeni ildə geniş yazacaq.
Bu uğura çatmağımda hər zaman mənə dəstək olan ailəmə təşəkkür edir, xüsusilə valideynlərimin əllərindən öpürəm. Dostlar, bu yolda son illərdə hər bir uğuruma sevinən sizlərə də dərin təşəkkürümü bildirirəm. Əminəm ki, bu gün üçün Azərbaycana bu uğurdan böyük töhfəm ola bilməzdi”, Nuran Abdullayev əlavə edib.
Qeyd edək ki, N.Abdullayev bu təyinata qədər Köln Universiteti Klinikasında şöbə müdiri vəzifəsində çalışırdı.
Gülnar Səlimova
Globalinfo.az
