Türkiyədə Liviya Ordusunun Baş Qərargah rəisinin ölümü ilə nəticələnən təyyarə qəzası bundan əvvəl baş verən oxşar hadisələri gündəmə gətirib. Təəssüf ki, zaman-zaman səfərlərdən, təlimlərdən qayıdan rəsmilərin faciəvi olayın qurbanı olmasının şahidi olmuşuq.
Globalinfo.az belə qəza hadisələrindən bir neçəsini təqdim edir:
1993-cü il, 17 fevral – Türkiyə Baş qərargah rəisi Eşref Bitlis Ankaradan Diyarbəkirə gedərkən uçuş qəzasında həlak olub. Təyyarədə onunla birlikdə olan heyət üzvlərindən heç kəsi xilas etmək olmayıb. Qəzanın səbəbi kimi buzlanma və pilotaj səhvi göstərilib.
1981-ci il, 29 sentyabr – İranda baş verən təyyarə qəzası nəticəsində İranın Müdafiə naziri Musa Nəmju, Ordu Baş Qərargahının rəisi Cəvad Fəkur, general Vəliullah Fəllahi ölüb. Ümumilikdə 80 nəfər qəzanın qurbanı olub. Qəza İraqla müharibədə önəmli bir uğur qazanıldıqdan sonra baş verib. Humeyni Mücahid-e Xalq təşkilatını günahlandırsa da, qəzanın səbəbi məlum deyil.
2024-cü il, 19 may – İran Prezidenti İbrahim Rəisi ilə birlikdə yüksək səviyyəli dövlət nümayəndə heyəti helikopter qəzasında həlak olub. Hadisə Rəisinin Azərbaycana səfərindən sonra baş verib. Pis hava şəraiti və görüşün məhdudlaşması qəzanın əsas səbəbi kimi göstərilib.
2025-ci il, 11 noyabr – Türkiyə Hərbi Hava Qüvvələrinə məxsus “Lockheed C-130 Hercules” hərbi yük təyyarəsi Gəncədən Türkiyəyə qayıdarkən Gürcüstan hava məkanında qəfil parçalanaraq yerə düşüb. Hadisə Gürcüstanın Sighnaghi bölgəsində orta havada uçuş zamanı baş verib. Uçuşda olan 20 hərbi personal və ekipaj üzvü həlak olub.
Son olaraq, 23 dekabr 2025-ci ildə Liviyanın Baş Qərargah rəisi Muhammad Ali Ahmed al-Haddad və digər yüksək rütbəli rəsmilər Türkiyədə rəsmi səfərdən qayıdarkən təyyarə qəzaya uğrayıb. Uçuş Ankara Esenboğa Hava Limanından Tripoli yönündə olub, lakin uçuşdan sonra radarla əlaqə kəsilib və təyyarə Haymana rayonunda qəzaya uğrayıb. Uçuşda 8 nəfər – Baş Qərargah rəisi daxil olmaqla bütün sərnişin və ekipaj həlak olub. Hadisə ilə bağlı Türkiyə və Liviyada rəsmi matəm elan edilib və araşdırma davam edir.
Ləman İmran
Globalinfo.az
Həmçinin oxuyun
