Hindistan hakimiyyəti ölkənin adını dəyişərək, keçmiş adı “Bharat”ı qaytarmaq niyyətindədir. Narendra Modinin rəhbərlik etdiyi hökumət parlamentin sentyabrın 18-22-nə təyin edilmiş xüsusi iclasında Hindistanın rəsmi adının “Bharat” olaraq dəyişdirilməsi ilə bağlı qətnamə təqdim edəcək.
Maraqlıdır, rəsmi Dehlinin belə qərar verməsi nə ilə bağlıdır?
Mövzu ilə bağlı Globalinfo.az-a danışan politoloq Elxan Şahinoğlu deyib ki, bir çox hindistanlı deputat, habelə Modi hökuməti Hindistan adının quldarlıq simvolu olduğunu düşünürlər:
“Məlum olduğu kimi, Hindistan Böyük Britaniya imperiyasının əsarətində olub. Yeni təkliflə çıxış edənlər Hindistan adının imperialistlər tərəfindən işlədildiyini, hindi dilində isə ölkənin adının Bharat olduğunu vurğulayıblar.
Elxan Şahinoğlu
Əslində, ölkənin adının dəyişdirilməsi bir müddətdir gündəmdədir. Hətta bu prosesə başlamaq məqsədilə bundan əvvəl bir neçə böyük şəhərin adı dəyişdirilib. Misal üçün 1995-ci ildə Bombey şəhəri Mumbay, bir il sonra Madras şəhəri Çennai, 2001-ci ildə isə Kəlkutta Kolkata adlandırılıb. Görünür, Modi hakimiyyəti hazırda növbənin ölkənin adına çatdığını düşünür.
Hətta sentyabrın 9-11-də Hindistanda G20 ölkələrinin sammitinə dəvət olunanlara dəvətnamələr “Bharat prezidenti” adından göndərilib. Ölkənin adının dəyişdirilməsi haqda qətnamə parlamentin sentyabrın 18-dən 22-dək keçiriləcək növbədənkənar iclasında müzakirə olunacaq”.
Turan Rzayev
Globalinfo.az
