“Bir çox hallarda gedib dərmanı ölkəyə gətirirlər, biz dərmanı külli miqdarda buraxa bilmirik. İnanın mənə, 2-3 qutu “Aspirin” gətirənə gömrük əməkdaşı heç bir söz demir”.
Globalinfo.az xəbər verir ki, bunu Milli Məclisin İqtisadi siyasət, sənaye və sahibkarlıq komitəsinin iclasında Dövlət Gömrük Komitəsi sədrinin birinci müavini, sədr vəzifəsini müvəqqəti icra edən Şahin Bağırov bildirib.
Onun sözlərinə görə, elə dərmanlar da var ki, onlara baxılmaldır:
“Qiymət məsələsinə gəlincə, qiymətlər gömrüklə bağlı deyil. Dərmanlara gömrük rüsumu yoxdur, yalnız ƏDV var. ƏDV də elə çox deyil. Dərmanlar ƏDV-dən azad oluna bilər”.
Şahin Bağırov qeyd edib ki, dərman şirkətləri gətirdikləri dərmanların dərhal anbarlara aparılmasını istəyirlər: “Azərbaycanda dərmanların qiyməti ilə bağlı Tarif Şurası tərəfindən müəyyən olunan hədlər var. Əgər qiymət bu həddən artıqdırsa, o, başqa məsələ. Türkiyə ilə Azərbaycan arasında fərq isə ona görədir ki, onlar bir çox dərmanı özləri istehsal edir. Bundan başqa, Türkiyə Avropa İttifaqı ilə Gömrük ittifaqındadır. Ona görə də bunu dərman satışı ilə məşğul olan şirkətlərdən soruşmaq lazımdır. Lakin dərman dəyərinin artmasına gömrük orqanlarının heç bir təsiri yoxdur”, – deyə Şahin Bağırov bildirib.
***11:55
“Gömrük sahəsində dərmanlarla bağlı problemlər var və vətəndaşlar bundan şikayətçidir”.
Globalinfo.az “Qafqazinfo”ya istinadən xəbər verir ki, bu barədə Dövlət Gömrük Komitəsi sədrinin birinci müavini, sədr vəzifəsini müvəqqəti icra edən, gömrük xidməti general-leytenantı Şahin Bağırov bildirib.
O qeyd edib ki, Azərbaycan qanunvericiliyinə uyğun olaraq bir şəxsin şəxsi istifadə məqsədi ilə dərman gətirməsi üçün konkret ölçülər yoxdur: “Biz hazırda bu ölçülərin, meyarların müəyyən edilməsi üçün Səhiyyə Nazirliyi ilə işlər aparırıq. Hazırda təəssüf ki, biz bu meyarları ölçə bilmirik. Bəzən olur ki, vətəndaşlar hətta ölkə qeydiyyatında olmayan dərmanlar belə gətirmək istəyirlər. Bu isə ölkəyə dərman idxal edən özəl şirkətlər tərəfindən narazılıqla qarşılanır.
Onlar bildirir ki, bu dərman ölkə qeydiyyatında olmasa da, apteklərdə satılır. Belə olan halda da biz ortada qalırıq. Bir daha qeyd etmək istəyirəm ki, hazırda şəxsi istifadə üçün dərmanların miqdarının müəyyənləşdirilməsi ilə bağlı hökumətin tapşırığı əsasında Səhiyyə Nazirliyi ilə işlər aparırıq”.
