“Bu, fərqli müharibə olacaq, çünki HƏMAS fərqli düşməndir”.
Globalinfo.az xəbər verir ki, bu barədə İsrail Baş naziri Benyamin Netanyahu ABŞ Prezidenti Co Baydenin İsraildə müharibə kabineti ilə görüşü zaman bildirib.
Onun sözlərinə görə, İsrail mülki itkilərin sayının minimum olmasına çalışdığı halda, HƏMAS mülki itkilərin sayını artırmağa çalışır: “HƏMAS mümkün qədər çox israillini öldürməyə çalışır, eyni zamanda, fələstinlilərin həyatına dəyər vermir. Onlar hər gün müharibə cinayətlərinin sayını ikiqat artırır. Öz mülki əhalisinin arxasında gizlənərək bizim mülki əhalimizi hədəf alır. HƏMAS fələstinlilərdən qalxan kimi istifadə edir.
HƏMAS son 11 gündə müharibə cinayətləri törədir və İsrail legitim olaraq terrorçuları hədəf alır. Təəssüf ki, mülki əhali də zərər görür. HƏMAS bütün mülki itkilərə görə məsuliyyət daşıyır və buna cavab verməlidir. Biz bunun daha bir ağır nəticəsini dünən gördük, fələstinli terrorçular tərəfindən atılan raket səhvən Qəzzadakı xəstəxanaya düşdü. Beynəlxalq ictimaiyyət bu hadisəyə haqlı olaraq qəzəbləndi, lakin bu qəzəb İsrailə deyil, terrorçulara qarşı yönəlməlidir. İsrail bu müharibədə mülki əhalinin minimum zərər görməsi üçün əlindən gələni edəcək. Biz onları (Qəzzadakı mülki əhalini – red.) daha təhlükəsiz zonalara getməyə çağırmışıq və çağırmağa davam edəcəyik”.
Netanyahu qeyd edib ki, Qələbəyə gedən yol çətin və uzun olacaq.
***12:17
ABŞ Prezidenti Cozef Baydenin İsrailə səfəri başlayıb.
Globalinfo.az “Report”a istinadən xəbər verir ki, bu barədə xarici KİV məlumat yayıb.
Onun İsrailin Baş naziri Benyamin Netenyahu ilə görüşü gözlənilir.
Xatırladaq ki, bundan əvvəl ABŞ dövlət katibi Antoni Blinken və müdafiə naziri Lloyld Oustin də İsrailə səfər edib.
