Əməkdar incəsənət xadimi Ziyadxan Əliyev Buzovnada “Xrustalnı” deyilən ərazidə yerləşən qəbiristanlıqda dəfn olunacaq.
Globalinfo.az xəbər verir ki, bu haqda Teleqraf-a Z.Əliyevin oğlu Səttar Əliyev məlumat verib.
“Atam uzun sürən xəstəlikdən əziyyət çəkirdi. İki ay idi ki, səhhəti pisləşmişdi. Bu gün axşam saatlarında vəfat etdi”, – deyə S.Əliyev bildirib.
***21:25
Sənətşünaslıq üzrə fəlsəfə doktoru, əməkdar incəsənət xadimi Ziyadxan Əliyev vəfat edib.
Globalinfo.az xəbər verir ki, bu barədə APA-ya onun oğlu məlumat verib.
Onun sözlərinə görə, atası bu gün axşam saatlarında vəfat edib.
Qeyd edək ki, Ziyadxan Əliyev 1948-ci il iyul ayının 1-də Şəmkirdə anadan olub. O, 1974-cü ildə Ə. Əzimzadə adına Azərbaycan Dövlət Rəssamlıq məktəbini fərqlənmə diplomu ilə bitirib. Sonradan İ. Y. Repin adına Sankt-Peterburq Rəngkarlıq, Heykəltaraşlıq və Memarlıq İnstitutunun sənətşünaslıq fakültəsində (1976–1982) təhsil alıb. 1984-cü ildən Azərbaycan Rəssamlar İttifaqının, 1987-ci ildən isə bu təşkilatın Rəyasət Heyətinin üzvü seçilib.
Ziyadxan Əliyev Azərbaycan təsviri incəsənətinin araşdırmaçısı kimi də bir sıra əsərlərin müəllifidir.
