Ukrayna müdafiəsinin ön xətti çökmək riski ilə üzləşib.
Globalinfo.az APA-ya istinadən xəbər verir ki, bu barədə “Politico” Ukrayna ordusunun adı açıqlanmayan iki yüksək rütbəli rəsmisinə istinadən məlumat paylaşıb.
Bildirilib ki, cəbhədə Ukraynanın üzləşdiyi hərbi mənzərə yaxşı deyil və Rusiya generalları qarşıdan gələn hücum əməliyyatları zamanı diqqəti hansı istiqamətə yönəltsələr, uğur əldə edə bilərlər.
Əlavə olunub ki, sayca üstün hərbi qüvvələri və həftələrdir Ukrayna mövqelərinə endirdiyi idarə olunan aviabombalar sayəsində Rusiya ön xəttin bir neçə hissəsini əzə bilər.
“İndi Ukraynaya heç nə yardım edə bilməz, çünki Ukraynanın ehtimal ki, üzərimizə göndərəcəyi çoxsaylı Rusiya qüvvələrinə qarşı balans əldə etməsi üçün ciddi texnologiya yoxdur. Bizim bu texnologiyamız yoxdur və Qərbdə də onlardan kifayət sayta yoxdur”, – hərbi rəsmilərdən biri bildirib.
O, döyüş meydanındakı hazırkı xoşagəlməz dinamikanın yalnız Ukraynanın müqaviməti və rusiyalı komandirlərin səhvi sayəsində dəyişə biləcəyini qeyd edib. Bununla belə, ukraynalı rəsmilər sadəcə Rusiyanın səhv etməsini gözləməyin strategiya olmadığını əlavə ediblər.
Rəsmilərdən biri deyib ki, Zalujni bu münaqişəni “bir şanslıq müharibə” adlandırıb. Çünki istifadə edilən silah sistemləri çox qısa müddət sonra istifadəyə yararsız olur, belə ki, rusiyalılar onlara müqaviməti öyrənirlər: “Məsələn, biz “Storm Shadow” (Böyük Britaniya) və SCALP (Fransa) qanadlı raketlərindən yalnız qısa müddət uğurla istifadə edə bildik. Rusiyalılar həmişə öyrənirlər. Onlar bizə ikinci şans vermirlər. Onlar bunda uğurludurlar”.
Digər rəsmi isə Ukraynanın ehtiyac duyduğu silah sistemlərini vaxtında ala bilmədiyini, bu silahların onlara ehtiyac duyulmadığı zaman tədarük edildiyini qeyd edib: “Pilot hazırlığı başa çatdıqdan sonra onlarla F-16 qırıcısının bu yay istifadəyə veriləcəyi gözlənilir. Hər silahın öz vaxtı var. F-16-lara 2023-cü ildə ehtiyac var idi, onlar 2024-cü il üçün uyğun olmayacaqlar”.
Ukraynalı zabit Rusiyanın F-16 qırıcılarını vurmaq üçün S-400 raket və radar sistemlərini yerləşdirəcəyi yerləri müəyyənləşdirdiyini qeyd edib: “Son bir neçə ayda biz Krımın şimalındakı Cankoydan ruslar tərəfindən partlayıcı başlığı olmayan raketlər atıldığını görürdük. Biz onların nə etdiklərini başa düşə bilmirdik, lakin sonradan anladıq: Onlar məsafəni tapmağa çalışırlar”.
Ukrayna rəsmiləri Kiyevin indi raketlərə, haubitsalara, 4 milyon mərmiyə, 2 milyon drona ehtiyac duyduğunu bildiriblər: “Biz hər zaman Qərbdəki tərəfdaşlarımıza bildirmişik ki, bizim döyüş təcrübəmiz var, döyüş meydanını anlayırıq. Onların isə resursları var və bizə ehtiyac duyduqlarımızı verməlidirlər”.
Hər iki zabit Ukraynanın eyni zamanda, daha böyük canlı qüvvəyə ehtiyac duyduğunu xatırladıb.
