ABŞ Prezidenti Donald Tramp müşaviri Riçard Qrenell barəsində nüfuz alveri şübhələri ilə bağlı araşdırma aparılması barədə göstəriş verib.
Globalinfo.az xəbər verir ki, bu barədə “Axios” məlumat yayıb.
Nəşrin məlumatına görə, araşdırma Ağ Evin hüquq müşavirinin aparatı tərəfindən aparılır. Yoxlamaya Trampın keçmiş vəkili və müşaviri Alina Xabbanın oktyabrın əvvəlində prezidentə təqdim etdiyi məlumat səbəb olub.
Xabbanın iddiasına görə, Qrenell 2025-ci ilin mayında onun həyat yoldaşı, türkiyəli iş adamı Turhan Mildona Con Kennedi adına İfa Sənətləri Mərkəzinə ianə etməyi təklif edib. Bunun qarşılığında isə iş adamı üçün ABŞ administrasiyasının nümayəndələri ilə görüşlər təşkil etməyi və onun Trampın da iştirak etdiyi tədbirlərə qatılmasını təmin etməyi vəd edib.
“Axios” yazır ki, Qrenell bu təklifi Mildona mətn mesajı vasitəsilə göndərib.
Administrasiya nümayəndələrinin sözlərinə əsasən, həmin mesaj Trampın təşəbbüsü ilə başladılan araşdırmanın əsas sübutlarından biri hesab olunur. Ağ Ev Qrenellin prezidentin etimadından şəxsi məqsədlər üçün istifadə edib-etmədiyini, eləcə də Kennedi Mərkəzinə yönəldilməsi nəzərdə tutulan milyonlarla dollarlıq ianələrin mənimsənilməsi ehtimalını araşdırır.
Xabbanın və Mildonun vəkilləri bildiriblər ki, iş adamı Qrenellin təklifi əsasında pul köçürüb. Lakin o, sonradan vəsaitin Kennedi Mərkəzinə çatmadığını öyrənib.
Əliyar Xəlil,
