Naxçıvan şəhərində Seymur Talıbova məxsus ofisin önündə etiraz aksiyası keçirilib.
Globalinfo.az APA-ya istinadən xəbər verir ki, aksiyada Naxçıvan Muxtar Respublikasının keçmiş maliyyə naziri Rafael Əliyev və Naxçıvan Muxtar Respublikası Şəhərsalma və Arxitektura Komitəsinin keçmiş sədri Hicran Rüstəmovun ailə üzvləri iştirak ediblər.
Seymur Talıbova məxsus “Reges Renta Cars” şirkətinin ofisinin önündə keçirilən aksiya zamanı onlar hazırda həbsdə olan Rafael Əliyev və Hicran Rüstəmovun məhz Seymur Talıbova görə həbs edildiyini, dövlətə olan borcları onun ödəməli olduğunu bildiriblər.
Qeyd olunub ki, S.Talıbov tərəfindən dövlətə pulun bir qismi ödənilib, yaxınları isə məhz ona görə 1 ilə yaxındır həbsdədilər. Artıq 3-cü dəfədir bura gəldiklərini deyən etirazçılar, hələ də S.Talıbovun qəbuluna düşə bilmədiklərini açıqlayıblar.
APA-nın əməkdaşı qarşı tərəfin mövqeyini öyrənməyə calişsa da, məsələ ilə bağlı açıqlama verilməyib.
Qeyd edək ki, Hicran Rüstəmov vəzifə səlahiyyətlərindən sui-istifadə edərək Muxtar Respublika ərazisində tikinti və abadlıq işlərinin yerinə yetirilməsi üçün nəzərdə tutulan ümumilikdə 212 milyon 361 min manat dövlət vəsaitinin, Rafael Əliyev isə 144 milyon manat dövlət vəsaitinin mənimsəməkdə ittiham edilirlər.
