Moskva məhkəməsi Kursk vilayətinin keçmiş qubernatoru Aleksey Smirnovu həbs etdi.
Globalinfo.az xəbər verir ki, bu barədə “RİA Novosti” məlumat yayıb.
O, dövlət müdafiə sifarişi çərçivəsində sərhəd möhkəmləndirmələrinin tikintisi üçün ayrılmış büdcə vəsaitlərinin mənimsənilməsində ittiham olunur.
İstintaqın məlumatına görə, Smirnov və onun keçmiş müavini Aleksey Dedov 800 milyon rubl məbləğində dövlət vəsaitinin mənimsənilməsində şübhəli bilinir. Bu vəsaitlər Kursk vilayətində müdafiə qurğularının tikintisi üçün ayrılmışdı. İstintaqın gedişində müəyyən edilib ki, bu tikinti işləri üçün ayrılmış 15 milyard rublun əhəmiyyətli hissəsi yeni yaradılmış və az sayda işçisi olan şirkətlərə köçürülüb.
Smirnovun adı bu işdə “Kursk vilayətinin İnkişaf Korporasiyası”nın keçmiş rəhbəri Vladimir Lukin ilə əlaqələndirilir. Onlar əvvəllər Moskvada mənzil-kommunal təsərrüfatı sahəsində birlikdə çalışıblar. İstintaqın məlumatına görə, Lukin əvvəllər də büdcə vəsaitlərinin mənimsənilməsi ilə bağlı araşdırmalarda iştirak etmişdi.
Qeyd edək ki, Aleksey Smirnov 2024-cü ilin may ayında Kursk vilayətinin qubernatoru vəzifəsinə təyin olunmuşdu. Sentyabr ayında keçirilən seçkilərdə 65,28 faiz səslə qalib gəldi, lakin dekabrın 5-də gözlənilmədən istefa verdi. Rəsmi olaraq bu, yeni vəzifəyə keçidlə izah olunsa da, qeyri-rəsmi mənbələr istefanın səbəbini sərhəd möhkəmləndirmələrinin tikintisindəki maliyyə pozuntuları ilə əlaqələndirirlər.
Dekabr ayında Smirnov İstintaq Komitəsinə dindirməyə çağırılıb. Dindirmədən sonra onun səhhəti pisləşib və kardioloji mərkəzə yerləşdirilib.
Aysel Əliyeva
Globalinfo.az
