“Azərbaycanın NATO-ya və Avropa Birliyinə (AB) üzvlüyünə tərəfdar olan, israrla buna can atan partiyalar, ictimai-siyasi təşkilatlar qonşu Gürcüstanın və Ukraynanın aqibətindən dərs çıxarmalı, ölkəmizin coğrafiyasının şərtlərinə uyğun olmayan istənilən strategiyanın bəri başdan iflasa uğrayacağını, bizə fəlakət gətirəcəyini anlamalıdırlar”.
Globalinfo.az xəbər verir ki, bu sözləri politoloq Elxan Şükürlü deyib.
Onun sözlərinə görə, Qara dənizin sahillərini yuduğu Gürcüstan və Ukrayna NATO və AB-yə üzvlük istiqamətində daha böyük məsafə qət etmişdilər, ABŞ və Avropanın onlara hərbi-siyasi dəstəyi də bizdən qat-qat güclü idi:
Elxan Şükürlü
“Ancaq indi hər iki ölkə NATO və AB-yə yaxınlaşmaq, bu ittifaqların anti-Rusiya siyasətlərinin faciəvi qurbanlıqlarına çevriliblər.
AB və NATO-nun təzyiqlərinə baxmayaraq, rəsmi şəkildə Qərbə inteqrasiya kursu seçmiş Gürcüstan onun ərazisini işğal edən Rusiyaya qarşı sanksiyalara qoşulmaqdan açıq şəkildə yayınır, hətta rəsmi Kremllə münasibətləri yenidən yumşaltmağa, bərpa etməyə can atır. Qafqaza müasir Qərb demokratiyasının nümunəsini gətirmiş bu ölkənin sabiq prezidenti Mixail Saakaşvili isə Qərbin və gürcü xalqının gözləri önündəcə məhv edilir.
Uzun müddət ərzində Rusiya ilə hərbi toqquşmaya hazırlanan və bu gün Rusiya ilə müharibə aparan, Ukraynaya NATO-nun və AB-nin misilsiz dəstəyinə baxmayaraq, bu ölkənin də aqibəti ortadadır: indi Ukraynanı elə duruma gətiriblər ki, rəsmi Kiyev AB və NATO-ya tezliklə üzv olmaq istəyirsə, ya işğaldakı ərazilərindən imtina etməli, ya da uzun illər bu arzusundan geri durmalıdır.
“Biz NATO-nun, AB-nin bir parçası olmalıyıq, xoşbəxtliyimiz oradadır” deyərək, bar-bar bağıran və bunun üçün Qərbin bütün istəklərini yerinə yetirməyə, bütün güzəştlərə getməyə hazır olan azərbaycanlı siyasətçilər hələ də anlamırlar ki, Azərbaycan iki anti-Qərb mövqeli dövləti, tarixi imperiyanı – Rusiya və İranı bir-birinə bağlayan yeganə quru dəhlizdir və bu ölkələrin özləri Qərbyönümlü olmadıqca, heç bir halda Azərbaycanın AB və NATO üzvlüyünə imkan verməzlər.
Bizi nə qədər Rusiya və İran əleyhinə işlərə sövq edib, sonra da özlərinə sığınmaq məcburiyyətində qoymaq siyasəti aparsalar da, ölkəmizin təhlükəsizliyini, rifahını və gələcəyini düşünən hər hansı sağlam siyasi təşkilat son 33 ilin acı təcrübəsini də nəzərə alaraq, mövcud geopolitik şərtlərdə AB və NATO-ya inteqrasiyanın tərəfdarı ola bilməz. Tərəfdardırlarsa, demək ki, onlar üçün Azərbaycanın yox, Qərbin maraqlarının həyata keçməsi daha önəmlidir”.
Turan Rzayev
Globalinfo.az
