Əfsanəvi futbolçu Pelenin tabutu vida mərasiminin təşkil olunacağı “Santos” futbol klubunun stadionuna aparılıb.
Globalinfo.az xəbər verir ki, bu barədə keçmiş futbolçunun oğlu Edson Çolbi du Nasimento məlumat verib.
Qeyd edək ki, futbolçu karyerasının çox hissəsini “Santos” klubunda keçirib.
Öz növbəsində azarkeşlər bayraqlarla Santos şəhərinin küçələrinə çıxaraq cənazə maşınını qarşılayıblar.
Braziliyanın “Santos” futbol klubunun stadionunda əfsanəvi futbolçu Pele ilə vida mərasimi keçirilir.
Globalinfo.az “Qafqazinfo”ya istinadən xəbər verir ki, mərasimdən “Globo” portalı canlı yayım edib.
Futbolçu ilə vidalaşmağa gələnlər arasında ailə üzvləri ilə yanaşı idmançılar, hökumət rəsmiləri, həmçinin FİFA prezidenti Canni İnfantino da var.
Vida mərasiminin bir gün davam edəcəyi gözlənilir. Dünya futbolunun əfsanəsi ilə vidalaşmaq üçün bəzi azarkeşlər 14 saatdan çox növbəyə dayanıblar. Onların bir çoxunun əynində Braziliya millisinin və ya “Santos” klubunun forması var.
Qeyd edək ki, Pele 19 il “Santos”da oynayıb. Braziliya yığması ilə 3 dəfə Dünya Çempionatının qalibi olub və karyerasını “Nyu-York Kosmos”da başa vurub. Hücumçu “Santos” və “Nyu-York Kosmos” komandalarının heyətində vurduğu 1 279 qolla Ginnessin “Rekordlar” kitabına düşüb.
Əfsanəvi futbolçu 82 yaşında xərçəng xəstəliyindən dünyasını dəyişib. Onun vəfat etməsindən sonra Braziliya hökuməti ölkədə üç günlük milli matəm elan edib.
